Press "Enter" to skip to content

Bynniaw ki bahaïing bym pat ïoh kem ki Pulit ïa u ‘Nongkynshoit’ ban thombor

Halor ka jingshah shoh ka Kong Agnes bad Amita
Shillong, Nohprah 08: Ki bahaïing hasem jong ka President ka Civil Society Womens Organisation (CSWO) Kong Agnes Khar shiïing, kila pynpaw ïa ka jingbynniaw bad buh dak jingkylli halor ka jingslem jong ki Pulit ban ïohkem ïa u ‘Nongkynshoit’ ban thombor ïa i Kong Agnes bad ka Amita Sangma.
U Hynmen i Kong Agnes Bah John F Kharshïing ula ong “ Ngi bynniaw jur ba shibnai ka por kala ïaid hynrei ka jingtohkit wat hapdeng ka juk Information Technology (IT), ym pat shym la ïohkem ïa ki briew ba ‘kynshoit’ bad ki nongïalam ban thombor, kiba la leh ym tang ïa ka kam bymman hynrei ki leh ruh ïa ki kam buittuh ha ka kamai pisa, kaba la wanrah ïa ka jingduhnong kaba khraw ïa ka iarong tyngka u paidbah”.
“Ngi ki bahaïing ngi la mad ïa ka jingtynjuh kaba khraw ha ka jingim, ban shu ïai ap shabar ka
ICCU jong ka NEIGRIHMS na ka kynta sha ka kynta, naka sngi sha ka sngi, na ka taiew sha ka taiew bad suki pa suki da ka jingiaduwai lem jong kiba bunbalang, baroh arngut ki Lanot kila ïakhun ïa ka jingpang jingmynsaw bad la nang ïohbor khamtam ka Amita kaba la ïohleit phai ïing bad i Kong Agnes iba la nang ïohbor suki pa suki, kaba la pynsah lyngngoh ïa kiba bun” ong u Bah John.
U Bah John ula buh dak jingkylli ruh halor ka rai ban thung daka jingtohkit Judicial Inquiry halor kane ka jingjia haba ki baha ïing hasem kynthup ka Amita Sangma kaba dei ka lanot, kala dawa jur ban aiti tohkit ïa kane ka jingjia sha ka CBI.
U Bah John u ong, haba phaidien sha ka rukom kut jongka Judicial Inquiry halor ka jinglait phet tuh ki koidi na Shillong District Jail, ka jingtohkit jong ki arngut ki Judge bala shongthait ha ka jinglut jingsep ba kot T.1 klur, kala dei kawei na ki jingtohkit kaba lut bun eh ha Jylla Meghalaya hynrei ka bym shym la poi shano shano ruh.
“Ngi la kyrmen skhem ba ka Cabinet bad ka Sorkar Jylla kin ai ka jingmynjur ïa ka jingtohkit CBI khamtam haba peit ïa ka jing shaniah bad ka jinglah ban treikam jong kane ka Tnad tohkit ha baroh kawei ka Ri” ong u Bah John haba bynrap ‘Wat haba peit ïa ka jingtbit, jingsted bad jinglut jingsep, ka jingaiti tohkit ha ka CBI kan kham seisoh bha hynrei sngewsih ba ka Sorkar Jylla kam shym la pdiang satia. Ka long kaba khyllah haba khmih ïa ka rukom treikam jong ka Sorkar Jylla bad ka jingtreikam kata ka Riti Synshar paidbah”.