Press "Enter" to skip to content

Da ka kaiphot ba shai yn wanrah ka sorkar halor ka jingtreikam ki Deptt

Shillong, Nohprah 08 : Ka sorkar jylla ka la pynkhreh ban wanrah da ka kaiphot kaba shai ne ka ‘white paper’ halor ka jingtreikam jong ki tnad treikam(department) bapher ka sorkar ha kine ki san snem baladep, khnang ban ithuh haduh katno ka jylla ka la ïaid shakhmat ne ka la ran shadien ha ka jingtreika.
“Kan long kaba bha shibun lada ngi lah ban wanrah da ka kaiphot kaba shai, khang ba ngin sngewthuh ïa ka jingtreikam bad ba ki paidbah ruh kin tip”, la ong u Myntri Rangbah ka jylla, u Conrad Sangma.
U Myntri Rangbah u la bthah ïa baroh ki tnad treikam ban pynkhreh ïa kane ka kaiphot ha shuwa ban pynmih lang ïa kid a ka sorkar. Lada ka sorkar ka lah ban wanrah ïa kane ka kaiphot, kan long ka sien kaba nyngkong eh hadien bun bun snem ba ka sorkar kan
wanrah ka kaiphot halor ka jingtreikam jong ki tnad treikam.
Dang shen ha ka dorbar ba kyrpang kaba la long ha ka 27 tarik u bnai baladep, u Myntri Rangbah, haba pynshai ïa ka jingkynnoh ki liang pyrshah ba ka sorkar MDA ha kine phra bnai kam shym la lah ban treikam bad kynnoh ruh bun ki skhim kiba la bei tyngka da ka sorkar kmie ki la sahkut lut khlem treikam shuh.
Uwei na ki MLA ka Liang Pyrshah,u Bah HM Shangpliang, haba wanrah ïa ka mat jingïatai ha kane ka dorbar, u la ong ba ki skhim kiba la wan na ka sorkar pdeng lyngba ka NEC, ka NLCPR, ki la sahkut bad ïoh pisa tang khyndiat, wat lada ka jingmang pisa ka long kaba la bun. U Bah Shangpliang, u la pyni nuksa ïa ki projek kiba kham heh kum ka Shillong Medical College, ka Engineering College, ka College of Commerce and Science ha Mawphlang, ki skhim surok ha Garo Hills, ki long tang ki katto katne na ki skim kiba kane ka sorkar ba ïalam da ka NPP kam shym la lah ban pynïaid shakhmat haduh mynta ruh.