Press "Enter" to skip to content

Dang duna ki skul ba sam jingnang jingstad ba paka ha jylla: Lahkmen Rymbui

Pynhap pyrda ïaka Jubili Rupa ka Kurimai Memorial LP School
Jowai, Nohprah 08: U Ma Lahkmen Rymbui, Myntri ka Tnad Pule Puthi ka Sorkar Jylla ula ong “Ka Jylla Meghalya haba nujor bad kiwei pat ki jylla ka dei kaba don bun eh ki skul, pynban rukom sam ïaka jingnang jingstad sha ki khynnah ka dang duna bad kam pat da long kaba janai ne paka”.
“Ka por kala dei eh ban pynbha bad pynjanai ïaka jingsam jingnang jingstad sha ki khynnah katkum ka juk mynta bad u nonghikai u dei ban pynthikna ba u sngewthuh ïa u khynnah bad u khynnah ruh u dei ban sngewthuh ïa kaei kaba u nonghikai u hikai ha kamra skul ban lah ban sei ïaka sap jong u/ka khynnah”, la ong u Ma Rymbui haba kren haka jingpynhap pyrda ïaka Jubili Rupa jong ka skul Kurimai Memorial LP School (1993-2018), Dongmihsngi, Ladthadlaboh Jowai haka sngi Thohdieng.
U Myntri ula ong ba ka donkam ka tei jingtei kaba biang ki ha ki skul naduh ka kamra klas, ki phyllaw bad kiwei kiwei, hynrei kaba kongsan ka dei ki nonghikai ruh ki dei ban long kiba tbit ban sam ïaka jingnang jingstad sha u khynnah ba un long u nongjop haka jingim jong u. U Myntri ula ban jur ban pyndonkam hok ïaka technology namar ba kala pynjaituh ïa u/ka khynnah ban pule ïaki kot kiba ban pynrpoh bad pynnep ïaka jabieng bad bunsien ki khynnah kim pyndonkam shuh ïaka library bad ki shu shaniah haka internet lyngba ka kor computer bad ki phone bad la kyntu ïa ki khynnah skul ban trei shitom haka pule puthi khnang ba kin lah ban ieng hala ki jong ki kjat.
Ha kane ka sngi la pynphuh pynphieng ïaka prorkam da ka jingrwai jingshad na ki khynnah skul bad la pyllait ruh ïaka souvenir jong ka jingïaid lynti kaba 25 snem jong kane ka skul bad la pynkup burom ruh ïaki nongseng ka skul bad kiwei kiwei.
U Chairman SMC u ma Rev. S Laloo, ula ïathuh ba ïa kane ka skul la pynïaid da ka Balang Unitarian bad la seng ïaka ha u snem 1993 kum ka Lower Primary ha ka kyrteng ka meirad Kurimai Lyngdoh kaba dei ka nongbud ba shitrhem jong u HK Singh u nongseng jong ka Balang Unitarian ha Rilum Khasi-Jaiñtia bad Karbi Anglong. La sdang shuwa ïa kane ka skul ha ka ïing shongwai bad la kyrshan ïaka da ki nonghikai ba thung da ka JHADC. Mynta kane ka skul kala don haduh ka kyrdan klas VIII.