Press "Enter" to skip to content

“Ka kam ri jingri ka dei ka tyllong kamai jakpoh ki nongrep”

Shillong, Nohprah, 08: “Ka kam ri jingri ka dei ka tyllong kamai jakpoh jong ki nongrep” ong u Myntri ka Rep ka Riang ka Sorkar Jylla, u Bah Banteidor Lyngdoh, haba kren kum u Kongsan ha ka Livestock Mela kaba shi sngi kaba la pynlong da ka ophis jong u District AH & Veterinary Officer, East Khasi Hills District lyngba ka National Livestock Mission 2018.
Ha ka jingïalang kaba la long ha madan phutbol Mawbynna ha ka shnong Kharang kaba hap hapoh ka Mawkynrew C&RD Block, u Bah Banteidor Lyngdoh u la pynpaw ba ka kam ri jingri ka dei ka kam kamai jakpoh jong ki nongrep sha ki shnong nongkyndong bad kyntu ruh ïa ki nongri jingri ba ki dei ban shim kabu ïa ki skhim jingïarap ba la ai da ka Sorkar lyngba ki tnat treikam bapher bapher.
U Kongsan, ha kane ka sngi, u la sam ruh ïa ki khusnam bad ki syrnot sha lai ngut ki nongrep jong ka Mawkynrew C&RD Block kiba im kamai jakpoh da ka kam ri sniang, ri syiar bad ri blang.
La pynlong ruh ïa ka jingïathir ïatai hapdeng ki nongri jingri bad ki ophisar bad la buh ruh ïa ki dukan ba la pynieng da ki tnat trekam bad ki nongsengkam na ka bynta ban pyni paidbah ha kane ka Mela.
Ha kane ka sngi la ïadonlang ruh u Block Development Officer, ka Mawkynrew C&RD Block, u Bah L. T. Tariang bad ka District AH & Veterinary Officer, ka Dr (Mrs) A. Laloo.
Ha ka jingpynlong ïa ka National Livestock Mission 2017-18, ha ka shnong Mawryngkneng, u Bah D. Nongrum, MLA u la long u Kongsan ha ryngkat ka jingïadonlang u Dr. O. B. Basaiawmoit, u Deputy Director ka AH & Veterinary, ka Dr. (Mrs) A. Laloo, ka District AH & Veterinary Officer, P. Ïawim, Horticulture Officer, u Dr. D. Dkhar ka AH & Veterinary Officer, Mawryngkneng C&RD Block bad ki nongri jingri.