Press "Enter" to skip to content

Kwah ka HC ïa ka kaiphod na ki ‘Stad Trei’ ban pynbeit ïa jingduna ka Health Deptt

Shillong, Nohprah 08: Ka Ïingkashari Meghalaya High Court kala pan ïa ka kaiphod na ki ‘Stad Trei’ (Expert) haba ïadei bad kumno ban pynbeit ïa ki jingdkoh bad jingduna hapoh ka Tnad ka Koit ka Khiah hapoh ka Jylla.
Haba shong bishar ïa kane ka kam hynnin ka sngi thohdieng, ka Division Bench ba kynthup ïa u Chief Justice Mohammad Yaqood Mir bad Justice SR Sen, ha ka hukum ba pynmih kala ong ‘Shuwa ba ngin pynmih ïa kano kano ka jingbthah halor kane ka kam, ngi sngewdei haba nyngkong ban ioh shuwa ïa ka kaiphod na ki Stad Trei”.
Ka affidavit bala aiti da u Joint Secretary ka Tnad ka Koit ka Khiah, kala pyntip ba ka Sorkar Jylla kan pyrshang katba don ki lad ki lynti ha kaban pynbeit ïa ki jingdkoh ka Tnad haba ïadei bad ka jingduna nongtrei ha baroh ki Hospital Sorkar bad ki jaka sumar ki ban sa leh da ki bynta bynta.
Hynrei, ka Sorkar kam shym la pynpaw satia ba lano bad kumno kan leh ïa kane ka kam.
Ha ka hukum ba pynmih ha ka 2 tarik Naitung mynta u snem, ka Bench kala pynmih ïa ka hukum ba donkam ban kynthup ïa kumba 3 ngut ki Stad Trei na ka Tnad ka Koit ka Khiah ba kin ai ïa ki jingai jingmut sha ka Supervisory Committee bala thung na ka bynta kane ka kam ha kaba hap ban pynkhreh ruh ïa ka road map ba kumno ban pynjanai ïa ka jingtreikam ki jaka ai jingsumar hapoh ka Jylla.
Ki Stad Trei ki dei ruh ban ai jingmut ïa ki lad ki lynti haba ïadei bad ki jingduna hapoh ka Tnad khnang ban lah ban weng noh ïaki da ki bor ba dei khmih.
Haba jubab ïa kane, u ASG A Paul ha ka por shong bishar ula aiti ïa ka thup kyrteng jong ki laingut ki Doktor kata Dr Devi Prasad Shetty (Cardiologist), Dr Samiran Nundy (Gastrointestinal surgeon) bad Dr Sadhan Brata Das (Internal Medicine) ba kin long ki Stad Trei ha kane ka kam.
Hynrei ka Kashari kala bthah ïa u Advocate bad Registrar (Judicial) ba kin kren ïa kine ki lai ngut ki Stad Trei ba kin ai ka jing mynjur hashuwa ban thaw ïa ka Committee. Ka Kashari kala buh ban shong bishar biang ïa kane ka kam haka 14 tarik Nohprah.