Press "Enter" to skip to content

Maham ka LARPDA ïa kiba pynïap dohum ha Ri-Bhoi

Nongpoh, Nohprah, 08: Kum kawei na ka thong ban pynneh pynsah ïa ki dohum ki dohpnat ha Ri Bhoi District kaba la ktah jur na ka jingpynïap dusmon ki runar, ka Lailad Area River Protection and Development Association ka la maham jur ïa kino kino ki riew shim kabu kiba pynïap dusmon ïa ki doh um ki doh wah.
Katei ka Association ka la pynmih ruh ka jingmaham kaba jur ha ki ar tylli ki wahbah kiba don ha Ri Bhoi ba kynthup ïa ka Wah Lailad bad ruh ka Wah Umthna ba hap ha Jirang Constituency.
Kane ka jingmaham kane ka Association ka dei ruh hadien ba bun ki riew shim kabu ki la wan ban pynïap dusmon da kaba ai dawai bad ruh pynbthei bom tang na ka bynta ka jingmyntoi shimet khlem da pyrkhat ïa ka jingduhjaid ki doh um ki doh wah.
Haba ïa kren bad ki Nongthoh khubor, u President katei ka Association, u Bah Turban Lyngdoh u la ong ba la seng ruh ïa kane ka Association ka long shi bynta ban ïada ym tang ïa ki dohum ki dohwah, hynrei ban ïada ruh na ka jingpynjot pathar ïa ka mariang ha ki sawdong sawkun jong kitei ki ar tylli ki wah.
Na ka liang kane ka Association ka la shim kawei ka rai ba nangne shakhmat kan peitngor ïa kitei ki wah ba kynthup naduh ki kam wieh dawai, bad pynbthei bom kaba la buh jingma ïa ki dohum ki dohwah bad na ka liang ka Association ka la maham ruh ba nangne shakhmat lada lap ïa kino kino ki riew shim kabu kan shim da ki lad kiba tyngeh, u la ong.
Shuh shuh, u la kyntu ruh ïa ki paidbah ba kin ai ka jingïatrei lang bad ruh khamtam ka bor District bad ka Wildlife Depart ment ban ïa trei ryngkat ryngkat bad lada lap kino kino kiba shim kabu dei ban pynshitom beit ïa ki katkum ki kyndon jong ka ain khnang ban lah ban ïada ïa ki dohum ki dohwah kibadon ha kitei ki ar tylli ki wah, u la bynrap.