Press "Enter" to skip to content

Paw ka kyrteng ki Myntri Sorkar ha ka kaiphod ba aiti sha Supreme Court

Na kiba donkti ha ki kam tih tuh ïa u dewiong ha Jylla
Shillong, Nohprah 08: Ka kaiphod bala aiti dang shen sha ka Ïingkashari Supreme Court, la kynnoh ba kala jer ïa ka kyrteng jong ki katto katne ngut ki Myntri ka Sorkar Meghalaya Democratic Alliance (MDA) ha ka jingiadonkti ha ki kam tih tuh ïa u dewiong hapoh ka Jylla.
Kane ka kaiphod ka dei kaba la aiti da u seniorAdvocate Colin Consalves uba la shah thung kum u Amicus Curiae ban iarap ïa ka Ïingkashari ha ka mukotduma tih tuh ïa u dewiong ha Jylla. Une u Nongïasaid Aiñ ula aiti ïa ka kaiphod halor ki jingshem bapher bapher ba ïadei bad ka jingtih tuh ïa u dewiong hapoh ki par ka Jylla.
Kat kum ka kyrwoh bala phah da u Bah Madan Sumer, u nongshongshnong ka Shnong Jowai la ong ‘U Amicus Curiae ha ka kaiphid ula jer kyrteng ïa ki katto katne ngut ki Myntri kane ka Sorkar ba mynta, kiba donkti ha kaban pynïaid ïa ka jingtih dewiong bad jingkhaii dewiong”.
Kat kum ka jingong jong u, ïa kane ka kaiphod la aiti ha ka jingshong bishar jong ka Ïingkashari Supreme Court ba long myn ha ka 4 tarik Nohprah, kaba ailad ban khaii biang ïa u dewiong bala dep tih lypa bad bala dei shim jingkheiñ, kiba la shu pynlang thup ha kylleng ki par ka Jylla. Kane ka jingailad ban khaii biang ïa u dewiong kan kut haduh ka 31 tarik Kyllalyngkot 2019.
U Bah Madan u ong ba u Sengbreezbirth N Marak ula buh ïa ka jingkyrpad ban shah shalan ïa u dewiong ba tang 1.76 lak Metrik Ton, uba dei u dewiong ba sah na kiba la dep tih lypa kat kum ka jingpynbna da ka Sorkar Jylla ha u bnai Jymmang mynta u snem. U Marak bala mihkhmat da u Nidhesh Gupta Senior Advocate, ula bynrap ruh ba ïa u dewiong ba dang sah dei ban kurup noh bad ban shu lilam lyngba ki kor internet (Online).
Ha ka por ba shong bishar, u Bah adan u ong ba ki don ki mamla shimet kiba la buh ïa kum kijuh ki mudui ban shah ïa ka jing shalan dewiong tang ïa u bala dep tih lypa haba pyrsngew ba don bun bah u dewiong bala dep tih lypa ula shu lang ha kylleng ki jaka ka Jylla bad kila kyrpad ban shah ha kaban shim jingkheiñ biang ïa une u dewiong bad ban shalan ïa u.
Hynrei ka Ïingkashari kam sngew ngeit satia ïa kane ka jingpynsngew bad kala buh jingkylli pynban la u dewiong ba don u de uba shu tih tuh ne em. Kala kyntait mardor ïa ka jingkyrpad bad kam shym la shah shuh ban shim jingkheiñ biang ïa u dewiong bala dep tih lypa bad ruh ïa ka jingkyrpad ban shah shalan ïa u dewiong haduh ka 31 tarik Jymmang 2019.
Halor ka jingkyrpad ban weng noh ïa ka jingkhang tih dewiong, u Bah Madal u ongba ka Ïingkashari haba sngap ïa ka jing ïasaid jong u Nongsaid Aiñ ka Sorkar, kala kynthoh ba ka Jylla bad ka Sorkar Pdeng ka dei ban wad ïa ka lad ka lynti kumno ban lah pynsdang biang ïa ka jingtih dewiong ha Jylla Meghalaya kham kloi kat kaba lah.
Ha kajuh ka por, ïa ka kam ba ïade bad ka jingkhang tih dewiong jong ka NGT ha Meghalaya, yn sa shong bishar pat ha ka 15 tarik Kyllalyngkot snem ban wan.