Press "Enter" to skip to content

Beh krad ka Mawpynthih ïa ki Engineer ka Power Grid, MeECL bad Ophisar Block

Ba pyrshah pynïaid ïa u line bording ba 220 KV
Shillong, Nohprah 10: Ki Nongshongshnong ka shnong Mawpynthih, la kynnoh ba kila beh krad ïa ki Engineer ka Power Grid, ka Meghalaya Energy Corporation Limited (MeECL) bad ki Ophisar ka Mylliem C&RD Block katba ki dang thmu ban wan pynshai ïa ka project pynïaid ïa u lain bording ba 220 KV na kane ka shnong ba don ha Upper Shillong.
Kane ka jingjia kala jia ha ka step sngi saitjaiñ bala lah ha Ïingdurbar Shnong Mawpynthih bad na ka liang u Engineer ka Power Grid ula mudui ruh da ka ejahar sha ki Pulit ba pyntip ruh ba kine ki Engineer ka Power grid, MeECL bad Ophisar ka Mylliem Block, kila shah tim shah tla, shah ktah kti bad shah byrngem byrsit ha ki paidbhur jong kane ka Shnong.
Kat kum ka khubor bala ïohlum, la ïathuh ba ka Power Grid, ka MeECL bad ki Ophisar na Mylliem Block, kila leit sha ka ShnongMawpynthih
ban pynlong ïa ka jingïalang paidbah na ka bynta ban ai jingpynshai haba ïadei bad ka jingthmu ban pynïaid lygnba ïa u lain bording ba 220 KV jong ka Power Grid na ka Shnong Mawpynthih. Une u lain bording u dei uba la tan naduh ka Jylla Tripura ban pynpoi sha New Shillong Township, na ka bynta ban pynbun ïa ka jingdon bording elektrik hapoh ka Jylla Meghalaya.
Kane ka ejahar ka dei kaba la mudui da u Bah I.B.Marbaniang uba dei u Engineer ka Power Grid bad kiba la shah ktah kti ki kynthup ïa u Bah O Riang Superintending Engineer ka MePDCL, u Vikash Chandra Manager ka North Eastern Region Power System Improvement Project (NERSIP) lem bad Ophisar ka Mylliem Block.
Ka khubor ka ïathuh ba ha ki snem bala lah, ka Shnong Mawpynthih kala dep ai ka jingmynjur ïa kane ka project jong ka Power Grid ha ka jingïalang bala lum da u Block Development Officer (BDO) barim ka Mylliem Block, kaba la pynlong lang ha kajuh ka por bad ki shnong ba marjan kynthup ka Maweitnai bad kiwei kiwei. La ong ba ha kane ka jingïalang, kine ki shnong kila rai ban pdiang ïa ka project bad ka Shnong Mawpynthih kala dep ai ruh ïa ka No Objection Certificate ïa ka project ha kaba ki trai jaka ruh kila pdiang bad mynjur ïa ka dor bai jaka.
Hynrei dang shen, haba ka Power Grid kala thmu ban leit sdang ïa ka project, la mih ka jingpyrshah na ki katto katne ki nong shongshnong, kaba la pynbor ïa kane ka Tnad pynmih bording ban pan ïa ka jingiatreilang na ka Ophis jong ka Mylliem Block ha ka ban pynshai sha u paidbah.
Dei halor kane ka nongrim, ka Ophis u BDO ka Mylliem Block kala khot pynlong ïa ka jingïalang paidbah ha ka sngi saitjaiñ ban wan ai jingpynshai da ki Engineer ka Power Grid bad ka MeECL shaphang ka project hynrei kane ka jingïalang kala pulom namar ka jingpynthut jong u paidbah uba ieng pyrshah ïa ka project khlem da ailad ïa ki Engineer ka Power Grid ne MeECL ba kin ai jingkren.
Ka khubor ka ïathuh, shuwa ka por bala buh ban long jingïalang katba ki Ophisar ka Mylliem Block ki dang ap ïa ka jingwan poi ki Engineer ka Power Grid bad MeECL, ki Kynthei jong ka Shnong Mawpynthih kiba la iamih paidbah, kila leit ban kynroi shuwa ïa ki Ophisar ka Mylliem Block ba ki khot ïa kane ka jingïalang bad kila beh krad ruh ïa ki na kane ka shnong. Hadien kane, kila beh krad sa ïa ki Engineer ka Power Grid bad MeECL ryngkat ka byrngem byrsit.
Kat kum ka ejahar bala mudui sha ki Pulit, la kynnoh ba ki paidbah ka shnong Mawpynthih kila ktah kti ruh ïa ki Engineer ka Power Grid bad MeECL haba beh krad ïa ki na Shnong.