Press "Enter" to skip to content

Hadien shi bnai tam mih noh i Kong Agnes Kharshiing na NEIGRIHMS

Shillong: Hadien shi bnai tam ne 32 sngi, i Kong Agnes Kharshiing, i la mih noh na NEIGRIHMS Hospital ryngkat ka jingïadonlang ki hymmen, ki para bad kiba haïing hasem.
Lah ban kdew hangne ba i Kong Agnes i la shah sumar ha katei ka Hospital ha ka 8 tarik jong u bnai baladep, hadien ka jingshah thombor ha ki briew ba la kynnoh ba kidei ki nongkhaïi bad ki nongtrei dewïong ha Tuber Sohshrieh, East Jaiñtia Hills, katba i dang leit tohkit bad ka Amita Sangma ïa ka jingkhaïi dewïong beaiñ.
I Kong Agnes iba la mynsaw jur bha na ki bynta jong ka khlieh, ka met ka phad, i la shah sumar bun sngi shuwa ha ICCU bad ynda i la tip briew bad kham ïoh bor la pynkynriah noh sha kawei pat ka kamra.
Katkum ka khubor ba la phah da kiba haïing , la ong ba i Kong Agnes in sah shuwa ha ïing jong u para bad na ka liang ka ïing ka peit shuwa ïa ka koit ka khiah jongi, ryngkat ka jingïarap ka team ba kyrpang ki Doktor na NEIGRIHMS ha shuwa ban rai da kumwei pat na ka bynta ka jingsumar shuh shuh. Ka ïing ka sem ka pynpaw ka jingsngewnguh ïa kito baroh kiba la wan peit bad phah ki khubor kitbok kitrwiang na ka bynta ka koit ka khiah jong i.