Press "Enter" to skip to content

Hukum ka SPIMC ïa ka Tnad Mining ban leh tyngeh ïa ki nongdie be-aiñ ïa challan dewiong

Shillong, Nohprah 10: Ka State Programme Implementation & Monitoring Committee (SPIMC) ka Sorkar Jylla kala hukum ïa ki Ophisar ka Tnad Mining & Geology ba kin leh da kaba tyngeh ïa kito ki briew kiba die be-aiñ ïa ki chalan dewiong ban khaii ïa u dewiong bala dep tih hapoh ka Jylla.
Kane ka hukum kala mih na u Chairman ka SPIMC u Saleng A Sangma, uba la pynlong ïa ka jingïalang bishar kam halor ka jing die ïa ki chalan dewiong bad ka Tnad Mining & Geology ba long hynne ka sngi ha Main Secretariat.
Kane ka jingïalang kala ïakren ïa ki mat bapher bapher ba ïadei bad ka jingtreikam jong ka Tnad bad ka Committee kala ai ruh ïa ki jingai jingmut ban pynjanai ïa ka jingtreikam jong ka Tnad.
Haba ïakren bad ki nongthoh khubor, u Saleng ula ong ba ka Committee kala bthah ïa ki Ophisar jong ka Mining & Geology ba ki dei ban aiti ïa ka thup kyrteng jong ki nongtih dewiong bad ki trai par dewiong bala mynjur da ka National Green Tribunal (NGT) bad ban pynmih ïa kine ki kyrteng ha ki kotkhubor bad ha ki website jongka Tnad.
U Saleng ula pynpaw ïa ka jingsngewkhia kaba jur halor ka jingdie tuh ïa ki chalan ban khaii ïa u dewiong bala dep tih bad ba shu pynlang thup haki par dewiong ha kaba ula ong, ba ki don ki riew shim kabu kiba la shna pisa na ka jingdie tuh ïa ki chalan sha kiba bun ki briew kynthup ruh ïa kito ki briew ki ba don u dewiong bym pat shim jingkheiñ.
“Da kaba pynmih ïa ka thup, kan iarap shibun ïa ki nongtih dewiong ne trai dewiong ba dei hok ba kin tip ïa ka rukom die ïa ki chalan kaban khanglad ruh ïa ki bym dei ki nongtih dewiong ne ba don par dewiong ba kin shim kabu da kaba die tuh ïa ki chalan ha ki dor kiba kham heh ban ïa kaba la mynjur da ka NGT” ong u Saleng haba hukum ïa ki Ophisar ka Mining &Geology ba kin leh da kaba tyngeh ïa kito ki briew kiba die tuh ïa ki chalan kat kum ki kyndon aiñ.
U Saleng u ong ba ka Tnad Mining & Geology ka dei ban pynkhlaiñ ïa ka jingtalasi ïaki kot ki sla bad ban khanglad shisyndon ïa ka jinglaittuh ki khajna hapoh ka Jylla. U Saleng ula pynpaw ïa ka jingangnud ruh ban don ka action plan halor ka jingpyndon kam ïa ka District Mineral Fund (DMF) bala mang T. 23 klur na ka bynta ban pyntreikam ïa ki kam pynroi bapher bapher ki ban pyn myntoi ïa kito ki briew ba shah ktah ha ki jaka ba don par dewiong.
Kat kum ka polici, ka Directorate of Mineral Resources ka donkam ban wanrah ïa ka Schedule III hapoh ka jingkhmih jong ka, kaba la khmih mynta da ka Tnad Forest & Environment ka Jylla, kaba kren halor ka jinglum khajna na ki minor mineral kum u shyïap, u maw, u mawshun bad kiwei kiwei.
Ka State Geological Programming Board ruh kala phaikhmat sha ki jingmynjur bapher bapher jong ka Mining Plan ha kylleng ki jaka jong ka Jylla. Ka ong ba kaneka Board kaba la khmih da u Commissioner & Secretary (Mining &Geology) ka donkam ban don ki nongmihkhmat na ki Tnad bapher bapher bad ba dei ban khmih noh da u Chief Secretary ka Jylla. Kat kum ka jingong jong u, ïa ki rai jong ka Board dei ban mynjur da u Myntri Rangbah ka Jylla lyngba u Myntri ba khmih ïa ka Tnad Mining & Geology.