Press "Enter" to skip to content

Jurip ka MRTF bad STEDS ïa ki khlaw Sona- pyrdi ban pynlong jaka jngohkai pyrthei

Khliehriat Nohprah 10 : Ban pynneh pynsah ïa ka jingithiang ka mariang,ban khring ruh ïa ki nongjngohkai pyrthei, ka Sonapyrdi Tourism and Economic Development Society (STEDS), ka la shim khia ban pynlong ïa ka thaiñ Sonapyrdi kum kawei na ki jaka ba paw ha East Jaintia Hills District, ka long kaba sngewtynnad ruh ban tip ba ka Sonapyrdi ka dei ka jaka ba bun bha ki jait thapbalieh (Land of Butterfly),kumjuh ruh ki jait mrad ba bun jait.
U bah Alan West uba dei u Chairman jong ka Meghalaya Rural Tourism Forum lem bad ki dkhot jong ka STEDS, myn ha ka 1 tarik mynta u bnai, ki la leit ban jurip ïa kiba bun ki jaka ha Sonapyrdi, ha kaba u bah Alan West,u la ai ka jingïaroh halor ka jingitynnad ka mariang sawdong ka Sonapyrdi bad ha ka jingjurip ïa ka wah Lukha u bah Alan West u la ong ba “Khmih lynti ba kane ka wah kan nym kylla rong Blue shuh bad ka khuid ka suba kan neh pateng la pateng khnang ba kane ka wah bad ki rud wah kin ïai long ki jaka ïaid kai pyngngad ki briew kumba ju long ha ki por u men ba rim”
U la ong ruh ka ki jaka ha Sonapyrdi, ki long shisha kiba la idei ban pynlong noh kum ki jaka jngohkai pyrthei bad lyngba ka mariang ba itynnad kan long ruh ka jingmyntoi kaba khraw ïa ki briew jong ka thaiñ ha kiba bun ki liang.
U bah Daiapher Lamare,President Sonapyrdi Tourism and Economic Development Society, u la ong “Ki khlaw ba rben ha Sonapyrdi kin khring ruh ïa kito ki briew kiba ju sngewtynnad ban rung khlaw,ban sngap bad ban sngew ïa ki sur ka mariang,lyngba ki sim kiba pah,ki mrad khlaw, ki thapbalieh ba bun rong.”
Shuh shuh ruh u bah Daiapher Lamare u la ïathuh ba ha une u bnai Rymphang 2019, ka STEDS ka don ka jingthmu ban pynlong noh ïa ka tamasa, ka Lukha Festival ha ki khlaw Sonapyrdi bad ha shilynter ki rud wah jong ka wah Lukha,ha kaba ki paidbah khamtam ki riew ieid mariang kin lah ban mad ïa ki lyer khuid jong ka mariang bad sngew ruh ïa ki sur bathiang ka mariang.
U bah Daiapher u la ong ruh ba ka Society ka don ka jingthmu ban sumar khuid ïa ka mariang bad kumjuh ruh bankyntiew ïa ka thaiñ ha ka rukom im ban ieid ïa ka mariang ban kyntiew ruh ïa ka ïoh ka kot jong ki briew jong ka thaiñ ha ki rukom bapher bapher, ha kaba ka jingdon ki khlaw ki paidbah ki lah ban shim ïa ka kam ri ngap ka ban long kum ka lad kamai jong ki, ka jing wan ki nong jngohkai pyrthei kan kyntiew shuh shuh ïa ka ïoh ka kot bad kiwei kiwei ki lad kamai ki ban nym ktah ïa ka mariang.