Press "Enter" to skip to content

Plie u MLA ïa ka madan Mawlai Parish ba la siang rong thymmai

Shillong, Nohprah : Ka 10 tarik u Nohprah, 2018 ka dei ka sngi sahkynmaw ïa ka Sacred Heart LP and UP School kaba sam ïa ki result jong ki khynnah bad kumjuh ïa ka Mawlai Parish, hadien ba u MLA bad MDC ka Mawlai constituency u Bah PT Sawkmie u la plie ïa ka madan ba la siang rong na ka bynta ban pynlong ia ka jingiaseng pynkup burom ïa ka jingdap 25 snem ka jingshakri u Phadar Marius Thongnibah ia ka Mawlai Parish.
Ban kynmaw burom ia u Phadar Marius, ka Mawlai Parish Pastoral Council kan pynlong ïa ka jingiaseng ban pynkup burom ïa une u phadar rangbah ha ka 14 bad kan kut ha ka 16 tarik mynta u bnai Nohprah,2018.
Haba ai jingkren kum u Kongsan ha ka jingïalang u Bah PT Sawkmie u la ai ka burom baroh sha U Blei, uba la plie ïa ka lad ka lynti ban ioh ban pynurlong ïa ka jingangnud ka Mawlai Parish Pastoral Council ban maramot siang rong biang ïa ka madan kaba la jot rathai, khnang ba kin ïoh ban pynlong ïa ka jingïaseng ban pynkup burom ïa u phadar rangbah.
“Nyngkong nga la artatien nangno ba ngan ïoh pisa ban siang rong ïa ka madan jong ka Sacred Heart LP and UP School, hashuwa ba ka Mawlai Parish Pastoral Council kan ïoh ban pyndonkam na ka bynta ban rakhe pynkup burom ïa ka jingdap 25 snem ka jingshakri jong u phadar rangbah, Marius Thognibah ia ka Mawlai Parish bad nga la phai sha U Blei ban duwai bad nga sngewkmen ba u la jubab,” ong u Bah PT Sawkmie haba kren hadien ba la dep plie ïa ka madan ba la siang rong hynne ka Lah sngi U Blei.
U la bynrap da kaba ong hadien ba ki dkhot ka Mawlai Parish Pastoral Council ki la wan ïakynduh ban pynpaw ïa ka jingdonkam, ha i por ba lyngkot hapdeng ka jingdonkam kyrkieh, nga la khuslai nangno ngan ïoh ban mang, hynrei da ka jingisynei jong U Blei, u la plie bad ngi la ïoh ban siang rong.” “Ngam lah khlem da ai khublei bad pynpaw ïa ka jingsngenguh ïa u Bah Ales Syiemlieh, u kontraktor uba la mih sha khmat ban ïarap ban pynsiang rong,” ong shuh shuh u Bah Sawkmie.
U MLA u pyntip paidbah ruh ba la mang T.10 lak na ka bynta ban siang rong thymmai ia ka madan bad ba un mang ïa ka Seng ki Rangbah Katholik T.1 lak man u snem na ka bynta ka kam ka jong ki. Ha ka juh ka por u MLA u pyntip ba u la dep mang sa T.2 lak na ka bynta ka Park ki khynnah kaba don ha Sacred Heart LP and UP School.
Na ka liang u bah Sterling Dkhar, General Secretary ka Mawlai Parish Pastoral Council haba ai jingkren u la ai khublei ia u MLA Mawlai ba la shah skhor ban sngew ia ka ka jingud jingnam jong ka Parish bad u pynpaw ruh ïa ka jingsngewnguh halor ka jingkular jong u ban mang T.1 lak ïa ki Seng Rangbah.
Ha kane ka sngi la don ryngkat u bah Marbud Dkhar, u kyrtong MDC ka Congress na Mawlai constituency,u MDC barim u bah Linus Shadap, u bah GG Pariat, u Phadar Jose bad kiwei, nalor ki khynnah skul LP bad UP bad ki kmie ki kpa.