Press "Enter" to skip to content

Dawa ka HYC bad TUR ïa ka Sorkar MDA ban ujor pyrshah ïa ka hukum u Justice SR Sen

Shillong, Nohprah 13: Ka Hynñiewtrep Youths Council (HYC) mynta ka sngi palei ka la phah da ka jingthoh sha u Myntri Rangbah ka Jylla, u Conrad K. Sangma bad sha u Myntri ka tnat Aiñ, u James PK Sangma da kaba pynpaw ba ka Seng kam sngew ïahap satia bad ka jingong jong u Nongbishar ka High Court ka Jylla Meghalaya, u Justice S.R Sen ban pdiang ïa ka kum ki nongshong shnong ïa ki ritpaid na ka ri Bangladesh, Pakistan and Afghanistan ba kynthup ïa ki Hindu, Sikh, Buddhist, Jain, Parsi bad Khristan.
U President ka HYC, u samla Robert Kharjahrin ha u kyrwoh ba la phah mynta ka sngi, u la ong, “ka seng kam sngewïahap ruh ba ong ba ka Sorkar ne ki Nongthaw Aiñ kin wanrah ïa ki Aiñ ba yn kheiñ ïa ki poiwir bar ri na ka ri Bangladesh, Pakistan bad Afghanistan ba long ki nong India lada kidei na ka niam Hindu bad kiwei lada ki wan sha India khlem ki kot kiba biang.
“Lada ngi shah ïa kum kine ba kin long Aiñ, ngi ki jaidbynriew ritpaid ha North East ngi sa shah tyllep noh ha ki poiwir mynder ri bad ngin sa duhbor noh ha ka synshar, ha ka ïoh ka kot, ngin sa duh ka khyndew bad ki riti dustur jong ngi kin sa duhnoh,” ong une u nongïalam ka Seng.
“Ka HYC ka la dawa na ka Sorkar Meghalaya ba ka dei ban thoh sha u Myntri Rangbahduh ka ri, sha u Myntri ka tnat Kam Pohing bad ha u Myntri ka tnat Aiñ ka Sorkar Pdeng bad sha ki MP ba kim dei ban wanrah kano knao ka aiñ ka ban kheiñ nong India ïa ki bar ri na ka ri Bangladesh, Pakistan bad Afghanistan kampher la ki dei na ka niam aiu ne ka jaidbynriew aiu,” la ong shuh shuh une u nongïalam ka Seng.
“Ka HYC ka la dawa ruh ïa ka Sorkar ba ka dei ban khmih bniah bad ujor sha Iingbishar ba kham halor ïa ka rai u Nongbishar ka Meghalaya High Court u Justice SR Sen uba la kheiñ be-aiñ noh ïa ki jingpynbna (Notification) ka Sorkar Jylla ha kaba ïadei bad ka jingai ïa ka Permanent Residential Certificate.
Ha kajuh ka por, ka Thma U Rangli Juki (TUR) ka la pynpaw ïa ka jingbym sngew ïahap halor ka rai ba pynmih dang shen da u Justice S R Sen jong ka Meghalaya High Court ha kaba ïadei bad ka jingai ïa ka Domicile Certificate sha u Amon Rana, da kaba kyntu ïa u Myntri Rangbahduh, ïa u Myntri ka tnat Kam Pohing, ïa u Myntri ka tnat Aiñ bad ïa ki MP ba kin mynjur ïa ka aiñ kaba ailad bad shah ïa ki Hindu, Sikh, Jain, Buddhist, Parsi, Khristan, Khasi, Jaintia bad Garos na Pakistan, Bangladesh bad Afghanistan ban long ki nongshong shnong ka ri India khlem kino kino ki kot ki sla kiba biang.
Ka TUR ka kyntu ïa ka Sorkar Jylla ba kan ujor pyrshah ïa kane ka rai ba la pynmih da u Justice S R Sen khnang ban ïoh biang ïa ka jingshahniah jong ki paidbah ha ka Jylla.
Ka Khun Hynñiewtrep National Awakening Movement (KHNAM) haba pyrshah ïa ka Citizenship (Amendment) Bill 2016, ka la ong ba kan ym ailad satia lada ka Sorkar NDA ba la ïalam da ka BJP kan pyrshang ban pynurlong ïa ka jingphohsniew da kaba pynlong ïa ka dewbah Indïa ‘Kawei ka ri, kawei ka Niam.”
“Ka Meghalaya ka dei kaba don markhap bad ka ri Bangladesh bad lada wanrah kum ïa kane ka aiñ, kan ktah haduh katta katta ïa ka jylla kaba don hapdeng ka jingshah tyllep jong ki trai shnong ritpaid. Ka nongrim bad ka jingdawa jong ngi ka long ban kem bad pynphai lut ïa baroh ki mynder ri na Jylla ban ïa kaba ai jaka rieh,” ong u Bah Thomas Passah, Vice President ka KHNAM CEC.
“Ka BJP ha ka election manifesto-2014 ka la kular ban pdiang bad ai jaka rieh ïa baroh ki phetwir Hindu hynrei ngin ym ailad ba ka BJP kan pynurlong ïa kane ka jingthmu,” ong une u nongïalam ka KHNAM bad bynrap, “ka Sorkar Jylla ba la ïalam da ka NPP ka dei ban kren da kaba shai halor kane ka mat.”