Press "Enter" to skip to content

Kyrpad ka CoRP ïa ka NGT ban khang tih maw

Shillong, Nohprah, 13: Ka Confederation of Ri Bhoi People (CoRP) haba sngewkhia ïa ka jingai mon u Syiem ka Hima Jirang ïa ki bar jylla na ka Jylla Assam ban tih khyndew bad maw ha jaka khappud bad ka Assam, ka la kyrpad ïa ka National Green Tribunal kaba dei ka Iingbishar kaba peitngor ïa ka jingpynjot ka mei mariang ba kan tuklar lem ïa katei ka kam da kaba pynjari da ka aiñ.
Katkum u kyrwoh ba la phah da u Vice President ka CoRP Sengkmie, u Bah Gershome Hat u la ong ba ki trok kit khyndew bad kit maw ki ïaid da ki spah tylli ha ka shi sngi na Meghalaya sha Assam. U la kynnoh ruh ba ki bar jylla na Assam ki kamai spah ha ka kyrteng ki Khasi.
U la ong ba ka jingtih khyndew bad tih maw be-aiñ ka dang ïai bteng ha Rani Jirang katba ha kiwei ki jaka kum ha Killing, Baridua ki la khang lut haduh mynta, katba kim pat ïoh ka Mining Plan hynrei ha Hima Jirang imat ym donkam Mining Plan la shu tih naphang ka tuba lah ne ba ïoh.
“Ka tnad Forest bad ka District Council ha Rani Jirang kim lah ban tehlakam ïa ki bar jylla kiba wan tih khyndew ne tihmaw bad ki shu peitkai ïa ki trok ba ïaid ha surok,” ong u Bah Hat.
“Ka jingtih maw ha ka thaiñ Rani Jirang ka la don palat 20 snem bad ka dang ïai bteng haduh mynta bad bun ki lum ka Hima kiba la madan la shu kam ei da Assam. Hynrei ym don ba ïohi ïa kane ka jingma katba ki bar jylla ki dang muja nalor ka kam die khyndew bad maw ban kamai spah bad ki ïohei sa ka jaka,” la kynnoh shuh shuh une u nongïalam ka Seng.
Halor kane, ka seng ka la ujor sha ki bor synshar Distrik bad sha u Syiem ka Hima Jirang ban khang noh ïa kane ka jingtih maw tih khyndew hynrei kam shym la poi shaei shaei ruh namar ka shu kut tang ha ka miej ïakren khlem seisoh.