Press "Enter" to skip to content

Marshiteng ki shnong ha West Khasi kim pat ïoh umbam umdih ba biang

Nongstoiñ, Nohprah 13 : Ka West Khasi Hills ka dei ka distrik kaba heh bad ïar bha hynrei haba phai ha ka ki kam pynroi bad ki jingïarap kiba wan na ka Sorkar na kabynta ka jingmyntoi jong ki paitbah nongshong shnong ka duna haduh katta katta la ka long ha ka pule puthi, ka koit ka khiah , ka rep ka riang ka kami kajih, ki lynti ki synkien, ka umbam umdih bad kiwei kiwei khamtam eh ha ki nongkyndong. Ha ka jingbuddien ïa ki kam pynroi kiba wan na ka Sorkar la lap ba palat mar shiteng na ki shnong ki thaw hapoh ka distrik ki dei ki bym pat don ïa ka um bam umdih bad ki paitbah nongshong shnong ki dang pyndon kam da ki pung tong um.
Nalorkata, la lap ba ki don katto katne tylli ki shnong kiba naduh u bnai Nohprah haduh u bnai Jymmang mynta u snem ki hap ban iaid 30 haduh 45 minit haduh ban da poi ha ki jaka ba don um. La lap ruh ba ki don ki shnong kiba la don ki pipe um kiba la pyntrei da ka PHE hynrei na ka jingbym biang jong ki tyllong um ban pynpoi ha ki jaka pynlang na ka bynta ban pynpoi ha ki longïng ki pipe um ki kylla sarang bad bun ruh ki shah tuh bad ki shu jah rngai.
Ka jingeh kaba ki paitbah nongshong shnong ki ïakynduh ka long haba ym biang ka um ki hap ban pynlut da ki phew hajar ban thied pipe jri nangta u motor ban tan bad pynpoi um ha ïng hynrei lada ym don bording eletrik ban pyntreikam ha u motor kin ym lah ban leh eiei.
Hakajuh ka por ka jingbym biang um ha ïng ka buh jingeh ruh na ka bynta ban leh khuid namar manla kawei pa kawei ka thliewïng ki hap ban pyndonkam ïa ki paiñkhana kumba la bthah da ka Sorkar na ka bynta ban wanrah ïa ka khuid ka suba ha poh ki shnong bad ban pynduh noh ïa ka jingleit paiñkhana pathar.
Ban pynshisha ïa kata, lah ban kdew ba kawei na ki shnong hapoh West Khasi Hills kaba la ïoh pdiang ïa ka khusnam na ka Sorkar Pdeng namar baroh ki longïng ha ka shnong ki la pyndonkam ïa ki paiñkhana hynrei haduh mynta katei ka shnong kam pat don umkor satia. Katei ka shnong ka dei ruh ka shnong kaba kyrduh um haduh katta katta.
Ha katei ka shnong ha ki snem 1997-98 na ka liang ka Sorkar ka la pynpoi ïa ka um hynrei na ka daw ba ïa ka um kaba pynpoi ha katei ka shnong la hap ban pynïaid lang na ka jaka pynlang um jong ka shnong Shohphria hadien katto katne por ka shnong Shohphria ka la nang bun ki nongshong shnong bad ka um kam dap shuh lada phah lang na katei ka jaka kumta ka shnong Mawïawet ka la duh noh bad baroh ki pipe um ki la shu jah rngai ym tip shuh shano ki poi bad ka dak kab sah haduh mynta ka dei satang katop tyrkhong kaba don ha kawei ka jaka kaba sharing lum.
Lada ka Sorkar kam lah ban pynpoi ïa ka um kaba biang ha kawei pa kawei ka shnong hapoh ka distrik kan jin da la bha ban pynsangeh noh ïa ka Swacch Bharat Misson namar kiba ïoh jingmyntoi ki dei tang kito ki nongshong shnong kiba shong ha ki jaka sor kiba ka Sorkar ka ju pynïoh kyrpang da ki Greater Water Supply Scheme (GWSS) katba ki nongkyndong pat namar ba ki dei kita Rural Area ki shitom jingmut haduh katta katta na ka bynta ka umbam umdih.