Press "Enter" to skip to content

Mynjur ka MoRTH ïa ki 44 tylli ki Project ba 321 klur ha Meghalaya

Shillong, Nohprah 13: Ka Ministry of Road Transport & Highway (MoRTH) ka Sorkar Pdeng kala ai ka jingmynjur haduh 44 tylli ki project shna surok bad shna jingkieng ha Jylla Meghalaya, kiba kot baroh lang haduh T. 321.88 klur.
Kine ki 44 tylli ki project ki dei kiba la tyrwa da ka Tnad Public Works Department (PWD) ka Jylla. Ka MoRTH kala ai ka jing mynjur ban bei tyngka ïa kine ki project ha ka 1 tarik nohprah lyngba ka Central Road Fund (CRF) jong u snem 2018-2019. Lah ban kdew hangne ba ka Meghalaya ha u snem bala lah, kala ïoh tang T. 80 klur na ka CRF.
“Kane ka dei ka sien ba nyngkong ba ka Jylla kala ïoh haduh T.321.88 klur na ka CRF. Ka Jylla kam pat ju tam ban ïoh pisa ïa ka T. 40/50 klur na ka CRF. Kane ka pyni ïa ka jinglah treikam jong kane ka Sorkar ba mynta” ong u Bah Prestone Tynsong, Deputy Chief Minister ka Jylla uba bat ruh ïa ka Tnad PWD haba ïakren bad ki nongthoh khubor hynne ka sngi palei.
Kat kum ka jingong u Bah Prestone, kine ki 44 tylli ki project ki dei kiba la tyrwa na ka bynta ka Jylla baroh kawei bad bun na kine ki project ki dei kiba heh ba kot ïa ka mang tyngka ba ym duna ïa ka T. 5 klur shaneng. U ïathuh ba ha Ri-lum Garo, kiba bun ki project ki dei ki jingpynkylla jingkieng maw ïa ki jingkieng dieng ba don lypa ha kylleng ka thaiñ.
Haba pyntip ba ki project ha Nongbah Shillong ki kynthup ïa ka jingpynheh ïa ki jingkieng bad ki surok, u Myntri u ong “ka MoRTH kala mynjur ban pynkylla Double Lane noh ïa artylli ki jingkieng- kawei ka dei ka jingkiengrim ha Wahumkhrah, Mawlai Nong pdeng bad kawei pat ka jingkieng Umpling ba ïaid lyngba na RR Colony”.
Nalor kane u ïathuh ba napdeng kine ki project, la mynjur ruh ban shna pynheh noh ïa ka surok ha Iew Rynjah khnangban lah weng ïa ka jingkhapngiah ha kane ka thaiñ.
Haba pyntip ba ka jingpyntrei ïa ka Mawlai Bye-Pass kala ïaid shaid shaid bad la shu ap mynta satang ki sngi ban pyndep, u Myntri u ong “Ngi la ïoh ruh ka jingmynjur ha ka CRF- 2018-2019 ban pynkylla noh ïa ka surok single lane na NEHU sha Mawroh da ka surok Double Lane bad ïa kane ka project la mynjur ban bei haduh T. 12 klur”.
“Ka jingpynkylla double lane ïa kane ka surok kan nym don jingeh namar ka tnad kam donkam ban shim jaka nangno nangno ruh lait noh tang khyndiat ka jaka kaba dei jongka Tnad Soil & Water Conservation” ong u Myntri.
Haba kylli ïa ka surok VIP Road, u Bah Prestone u ong ba ka Sorkar ka don jingthmu ban wanrah jingpynkylla noh ha ka jing mait lynti ïaid (alignment) jong kane ka surok bad ruh ban pynkylla noh ïa ka sha ka surok Double Lane.
Lah ban kdew hangne ba ka surok VIP Road ka dei kaba sdang na Mawlai Mawroh bad kut hajan ka Kad Liengsuiñ Umroi. Kane ka surok ka ïaid lyngba bun tylli ki Shnong ka Mawlai ba kynthup ïa ka Umshing Mawkynroh-Mawkynroh- Mawtawar, Mawsiatkhnam-Umrynjah bad kut ha Umroi hajan ka Kad.
Kat kum ka jingong u Dy CM, ka Sorkar ka don jingthmu ban pynkylla noh ïa ka lynti ïaid jong kane ka surok ka ban long noh na Mawroh-Umshing Mawkynroh-Mawkynroh, Mawtawar-Mawsiatkhnam bad beit beit kan ksam lyngba shajan ka jingkieng Dwar Ksuid khlem da ïaid shuh na ki thaiñ Umrynjah.
“Nga la dep bthah ïa ka Tnad ba kan pynkhreh ïa ki jingdonkam baroh halor kane ka project bad ngi khmih lynti ban sa sdang noh ha u snem ban wan 2019-2020” ong u Bah Prestone haba kynthoh “Ka surok na Mawsiatkhnam sha Umrynjah kam ïahap satia ha ka jingmait lynti (alignment) nalor ba don sa ka kynroh ka Kad Liengsuiñ”.
Nalor kane, u Bah Prestone u ïathuh ba ka Sorkar kala buh jingthmu ruh ba ha u snem 2029-2020, kan tyrwa ban shna sa ïa ka surok ba pynïasoh ïa ka surok Caroline-MES beit beit sha Umpling ban pynduna ïa ka jingkhapngiah ka thaiñ Rynjah. U pyntip ba ka Tnad PWD kala dep pynkhreh ïa ka Detailed Project Report (DPR) halor kane ka project.
Shuh shuh u Bah Prestone u pyntip ba ka Tnad PWD kala dep shna ruh ïa ka mang tyngka jong kawei ka surok bye-pass ba donkam bha ha Nongbah Shillong ka ban iarap ban pynduna ïa ka jingdheng kali bad kane ka surok ka dei kaba sdang na Rilbong bad pei lyngba ka Mahavir Park.