Press "Enter" to skip to content

Mynta yn ïakhih ki Nongtrei MCCL

Shillong, Nohprah 13: Ka Mawmluh Cherra Cement Limited Employess Union (MCCLEU) kan pynlong ïa ka jingsangeh treikam mynta ka sngi kum ka dak ban pynpaw ïa ka jingbym sngewtynnad halor ka jingbymlah jong ka Sorkar Jylla ban siewkhuid noh ïa ka tulop ba phra bnai bala pynsahteng haduh mynta.
Kane ka synjuk ki Nongtrei ka MCCL hapoh ka jingïalam u President Bah S. Diengdoh, kala ïakynduh ruh ïa u Myntri ka Tnad Industries Bah Sniawbhalang Dhar hynne ka janmiet ha Secretariat ban kyrpad ba un tuklar lang ha kaban pynïoh lut noh ïa baroh ki hok jong ki Nongtrei ka MCCL.
Haba ïakren bad ki nongthoh khubor, u Bah S.Diengdoh ula ïathuh ba na ka liang u Myntri ula ai ka jingkular ba un sa shim khia ïa ka jingeh jong ki Nongtrei ka MCCL bad ba un sa rah ïakren ïa kine ki jingeh bad u Myntri Rangbah ka Jylla khnang ba ka Sorkar kan leh eiei noh ïa ki.
U Bah Diengdoh u ïathuh ba na ka liang jong u Myntri ula pan por ruh na ka MCCLEU ba un pynbeit ïa kine ki jingeh jong ki bad u Myntri Rangbah.
Kat kum ka dorkhas bala aiti ha u Myntri, ka MCCLEU kala dawa ba ka Sorkar kan siew pynkhuid noh ïa ka tulop ba phra bnai bala pynsahteng naduh u Nailar 2015 haduh u Lber 2016. La dawa ruh ba kan siew noh ïa ka bainong ba trei tam ïa ka por trei (Overtime) kaba sahteng naduh u Naiwieng 2013 haduh u Nohprah 2016 bad naduh u Jymmang 2017 haduh mynta mynne.
Kat kum ka jingïathuh u Bah Diengdoh, ka jingsiew ba ki Nongtrei ka MCCL ki dei ban ïoh kynthup ka tulop ba sahteng phra bnai bad ka jingtrei tam ïa ka por trei, kala kot ym duna ïa ka T.8 klur.
Haba ïadei bad ka jingsangeh treikam, u Bah Diengdoh u ong ba kane ka dei tang ka jingsdang bad ka Seng MCCLEU kan sa shong jingïalang biang hadien ka por sangeh treikam ban shim rai ïa kiwei pat ki dienjam ba dei ban shim.
Shah kynnoh ka NEEPCO ba leh