Press "Enter" to skip to content

Pan jingpynshai ka Iingbishar na ki Ophisar ka Sorkar bad ka Kong Patricia

Balei ban nym pynngat ‘Contempt of Court’

Shillong, Nohprah 13: Ka Ïingkashari Meghalaya High Court ka la pan jingpynshai na ki Ophisar Sorkar kynthup ruh ka Editor ka Shillong Time Kong Patricia Mukhim bad ka Trai jong ka Shillong Times, ka Shobha Chaudhury ba kin pynshai balei ban nym pynngat ‘Contempt of Court’ pyrshah ïa ki.
Ka Ïingkashari bala khlieh da u Chief Justice Mohammad Yaqoob Mir bad u Justice H.S.Thangkhiew ka la pan ïa kane ka jingpynshai haba ïadei bad ka hukum ba pynmih da ka Kashari u Justice S.R Sen ba bthah ïa ka Sorkar Jylla ban thaw ïa ka Protocol Service bad ka Meghalaya State Guest Rules of Retired Judge nalor ban ai ruh ïa kijuh ki jingmyntoi kumba ïoh ki Judge ba mynta ba kynthup ïa ka Kurim bad ki Khun ki Kti.
Ka Kashari u Justice SR Sen kala aipor shitaiew ïa ka Sorkar Jylla ban thaw ïa ka Protocol Service bad ka Meghalaya State Guest Rules lem kumta yn pynngat ïa ki Ophisar hapoh ka Suo-moto Contempt pyrshah ïa ki Ophisar ba dei khmih ïa kane ka kam.
Ha ka jingbishar jong ka Kashari u Justice SR Sen hynne ka sngi, la pynmih ïa ka hukum ba ong ba ka Sorkar Jylla haduh mynta kam pat leh eiei katkum ka jingbthah ba la ai por shitaiew. Ka ong namar kane la pynngat ïa ki Ophisar ka Sorkar ha ka mukotduma Contempt of Court”.
Ka Ïingkashari kala hukum ïa u Chief Secretary, Additional Chief Secretary I/c GAD bad u Secretary ka Tnad Law ba kin ai ka jingpynshai ba balei yn nym pynngat ïa ki hapoh ka Contempt of Court namar ka jingpynkheiñ ïa ka hukum bad ka la hukum ïa kine ki Ophisar ba ki dei ban don hapoh ka Ïingkashari ha ka 17 tarik Nohprah.
Namar kane ka hukum, ka Sorkar Jylla ka la leit buh hakhmat ka Division Bench ïa ka jingkyrpad ban pynsangeh shuwa shipor ïa ka hukum jong ka Kashari Single Bench u Justice SR Sen. Ka kashari Division Bench ka la shim bishar hynne ka sngi ïa kane ka jingkyrpad hynrei ka la pynkynriah noh ïa ka jingbishar haduh ka 17 tarik mynta u bnai Nohprah.
Ha kajuh ka por, ka Ïingkashari Single Bench ka la hukum ïa ka Editor jong ka kot khubor Shillong Times bad ka trai ka Shobha Chaudhury ba kin file show cause balei ba ym dei ban pynmih hukum ba long pyrshah ïa ki namar ka jingthoh khubor pyrshah ïa ka hukum ka Kashari ba mih ha ka 6 tarik bad 10 tarik u Nohprah.