Press "Enter" to skip to content

Ryngkat ki khynnah ba duna dkhotmet rakhe Khristmas u MLA/MDC ha Jirang

Nongpoh, Nohprah 13: Kum shibynta ba ki khynnah ba duna haki dkhot met kin ioh ban don bynta lang ban lehkmen bad rakhe ïaka Khristmas kumba ioh kiwei pat ki khynnah kiba biang haka met ka phat, u MLA ka Jirang Constituency u Bah Sosthenes Sohtun mynta ka sngi u pynlong da ka prokram ban ïalehkmen Advance Christmas bad ki khynnah kiba don jingduna haki dkhot met.
Ïa katei ka jinglehkmen Advance Christmas la pynlong ha ophis u Block Development Officer Jirang bala sakhi ruh da ka jingdon lang u Bah Victor Rani MDC ka Jirang Constituency, Bah D Syiemiong BDO ka Jirang Block, Bah RH Wahlang Pa’iem ka Hima Jirang, Bah P Diya Chairman BDMC, Sordar Mawdem bad u ba dei ruh u President ka Western Dorbar kum u shongknor ha katei ka jingïalang, Bah Balawan Syiemiong, Bah Sranly Wahlang Secretary Western Dorbar, Bah Najim Kharmalki Sordar ka Patharkhmah bad kiwei kiwei ki riew rangbah.
Ka long ruh ka jingkmen kaba khraw ba ha katei ka sngi ki khynnah kiba duna haki dkhot met kila ioh ban lehkmen kumba ioh lem kiwei ha shwa ba ka Khristmas kan sa poi sa kumba katto katne sngi, ryngkat ki song jing ai sngewbha bala ai bad sam sha ki spah ngut ki khynnah ba duna dkhot met da u MLA ka Jirang.
Haba kren ha katei ka sngi, naka liang u Bah Sosthenes Sohtun MLA ka Jirang u la ong ba kane ka dei ka sien ba nyngkong ba kum u MLA u la shimkhia ha katei ka thaiñ namar ba ym ju don MLA ba lehkmen sngewbha Khristmas bad ki khynnah ba duna dkhot met ha katei ka thaiñ, hynrei dei haka jinglong MLA jong u ba u la shimkhia ban kynmaw lem ïa kitei ki khynnah kyrpang ba kin ioh bynta lem kumba ioh kiwei pat.
Shuh shuh u Bah Sohtun u la ong ruh ba bun haka imlang ka sahlang ki khynnah ba duna haki dkhot met ki shah kyntait bad shah kheiñ ba kim dei ban don bynta lang, hynrei kum u MLA u la kyntu ba kim dei ban don ka jingïapher bad don kum kata ka mynsiem hynrei ki dei ban ïa ieid bad long kum shi para kum ki jingthaw ba kyrpang jong u Blei.
Ha kawei pat ka bynta naka liang u MLA ka Jirang u la kyntu ruh ïaka tnad sorkar kaba dei peit ïaki ba kan plie ïaka jingkhang naka bynta jong ba kin tyngshain bad phyrnai namar man u wei pa uwei u lane ka khynnah ki don la kajong ka jong ka sap kyrpang kaba u Blei u la bynta haki, ryngkat ka jingïatreilang naduh ki paidbah bad ki tnad sorkar bad ki nongmihkhmat khnang ba kum kitei ki khynnah kin nym shah iehnoh beiñ hynrei ba kidei ban ioh bynta lem kumba ioh kiwei.
La ai jingkren ruh ha katei ka sngi da u Bah Victor Ranee MDC ka Jirang, Bah RH Wahlang Pa’iem ka Hima Jirang bad kiwei kiwei kiba la pynpaw ka jingsngewkmen kaba khraw halor ka jing kloi u MLA ban shimkhia naka byntaa ban lum ban lang ïa kitei ki khynnah kiba duna haki dkhot naka bynta ba kin ioh lehkmen Advance Christmas ryngkat bad ki kmie ki kpa jong ki kiba la poi ha katei ka sngi.
La pynphuh pynphieng ruh ha katei ka sngi da ki jingrwai bad jingrwai ryngkat ka sap kyrpang bala pyni da kiba duna haki dkhot met, ban pyni shaka pyrthei ba maki ruh kim shym la duna haka sap rwai bad shad kumba long lem kiwei.