Press "Enter" to skip to content

Snohkti ka Balang bad ka tnad Rep ban plie lad ïa ki nongrep ka thaiñ Riwar

Shillong Nohprah 13 : Ka Social Economic Life Development and Relief Committee (SELDRC) kaba dei jong ka District Lum Lyngkien Sohphie, Home Mission Presbytery ryngkat ka jingtreilang bad ka tnad Horticulture bad Agriculture ha ka sngi Nyngkong ki la ai jinghikai kyrpang ïa ki nongrep ka thaiñ Riwar ba hap hapoh ka Raid Rngi, Mawkynrew Block.
Lyngba katei ka jinghikai kaba la pynlong ha Mawlyngkot, da ki spah ngut ki nongrep na ki shnong bapher bapher jong ka Raid ki la ïoh jingtip shaphang ka rukom rep ïa kiwei pat ki jingthung kiba lah ban ai jingkamai ïa ki paid nongrep khnang ba kin nym shaniah tang ha kaba rep tympew bad synsar.
Kitei ki ophisar na ka tnad Rep ki la batai bniah bha halor katei ka rukom rep, khamtam haba ïadei bad ka rep kophi, sohñiamtra bad ki jinghikai kumno ban shna bun jait ki umsoh na ki soh, bad ki jingbam kiba lah shisha ban kham pynheh dor shuh shuh ïa ki mar rep bad pynïohnong ïa ki nongrep.
Na ka liang u District Horticulture Officer (DHO) ka East Khasi Hills district, Bah S. Kharnaior u la kren shaphang ka jingkongsan ka rep soh khamtam eh u sohñiamtra uba ki ri ha kylleng ka pyrthei ki la tip da ka kyrteng “Khasi Mandarin” namar u dei u soh uba bang bad kham pher ka jingmad haba ïanujor bad kiwei pat ki soh.
Utei u ophisar u la kren ruh shaphang ka ïew bad ka jingdie ïa ki mar rep khamtam haba ïadei bad ka jingshah khñoit dor ki nongrep ha kaba u la banjur halor ka jingdonkam ba ki nongrep kin shimkhia ïa ka kam rep bad ïa ki mar rep kumba leh ki nongkhaïi. Nalorkata, u DHO u la hikai ruh ïa ki nongrep ba ki dei ban thew lypa ïa ki mar rep na ïing hashwa ba kin leit die sha ki ïew ne aiti ïa ki mar sha ki nongkhaïi khnang ba ki brïew kiba thied ïa ki mar rep, kin nym lah satia ban thok haba ïadei bad ka rukom thew.
Haba kren shaphang ka kam rep sohñiamtra, u Bah Kharnaïor u la batai shaphang ka jingsumar ïa ki tynrai soh bad ym dei ban shu pynkhuid tang shisien shisnem, bad ka jingjngai jong uwei u tynrai diengsoh na uwei pat ka dei ban kham jngai. Une u DHO u la pynshai ruh ba ka jaka rep soh ka dei ruh ka jaka kaba biang eh ban ri ngap, bad haba don ki ngap ki jingthung ruh ki kham seisoh.
La ïoh ruh ka jinghikai na kiwei pat ki ophisar ka tnat Horticulture halor ka rep tit, bad ki buit ban shna umsoh ïa ki soh kiba mih ha thaiñ Riwar bad kumno ban pynkylla ïa ki sha ki jait jingbam bapher bapher kiba lah ban pynïohnong ïa ki nongrep.
Kitei ki ophisar ki la pynshlur bad hikai ia ki nongrep kumno ban rep khlem da pyndonkam dawai.
Ïa ka rukom rep kophi la ai jingpynshai da u Bah Dondor Giri Nongkhlaw uba dei na ka Smoky Falls Tribe Coffee, ka kompani kaba ju pynïaid ïew ïa u kophi na kane ka Jylla uba la batai naduh kumno ban sara symbai, ka por ba mih ki soh kophi, bad ruh ïa ka jingïohnong kaba ki nongrep kin ïoh na utei u jingthung.
Da kaba kdew halor ka jingrep ïa u slasla ha thaiñ Mawlyngot uba la paw bad bna nam bad pynïaid ïew da ka kyrteng “Urlong Tea,” u Bah Nongkhlaw u la ong ba ruh ki nongrep kim dei ban khuslai shaphang ka ïew lada ki rep kophi namar u kophi u dei uba lah ban pynïaid, bad ka dor ruh kam ju hiar.