Press "Enter" to skip to content

Wat theh umphniang ha ka ding, ong u Myntri ïa ka Punjab

Shillong, Nohprah 13: U Myntri pynroi sor ka Jylla Bah Hamletson Dohling ula kyntu ïa ka Sorkar Punjab ba kan kiar ha kaban theh umphniang halor ka ding namar ka rai ban ai song jingiarap ba T. 60 lak
sha ki paid Harijan ha Them Iew Mawlong.
“Ngim sngewtynnad satia ïa ka rai jong ka Sorkar Punjab bad ngi kyrpad ïa ki ban nym theh umphniang halor ka ding” ong u Bah Hamlet haba ïakren bad ki nongthoh khubor hynne ka sngi palei.
Ka Sorkar Punjab ha ka sngi ba-ar kala rai ban iarap song tyngka T.60 lak kum ka bai lutksan sha ki paid Harijan ba sah ha Them Metor namar ka jingshah pynjulor ki nongkynti ha ka jingkulmar Them Metor ha Nongbah Shillong, kaba jia myn ha u bnai Jymmang-Jylliew.
Haba kynthoh ba kum kane ka rai ka dei tang ka kam ban ïalam bakla ïa ki Nongshongshnong ka Ri, u Bah Hamlet ula ong ba ha ka por ba don ka jingïakhih, ym shym la don satia wat tang uwei u maw bala kawang ïa ka skul ne ka Gurudwara ba don hapoh Them Metor.
“Hynrei haba ïohi ïa kane ka rai bala shim da ka sorkar Punjab, la i pynban kumba don kata ka jingpynjulor ba shyrkhei haka jingïakhih hynrei ka bym shym la don eiei satia” ula ong. Haba kylli, u Myntri ula ong ba ka Sorkar Punjab kam dei ban shu sngap iano iano hynrei ban wad ïa ka jingshisha hashuwa ban shim ïa kane ka sienjam da kaba pynshong nongrim ïa ki jingtip ba lamler. Ula kyntu ruh ïa ka Sorkar Punjab ban nym tuklar than eh halor ka Them Metor hynrei ban shaniah ha ka sorkar Meghalaya ba kan wad ïa ka lynti kaban wanrah ïa ka jingsuk ba shirta.
Kat kum ka jingong jong u, u Myntri Rangbah ka Jylla Conrad Kongkal Sangma, un sa ïakren shen bad u Myntri Rangbah ka Punjab halor ka jingai song jingiarap.