Press "Enter" to skip to content

Pynshai u Justice SR Sen ïa ka hukum ba kyrshan ïa ka CAB ka Sorkar NDA

Shillong, Nohprah 15: U Justice S.R Sen, Judge jong ka Ïingkashari Meghalaya High Court, ula ai ka jingpynshai ba ka hukum ba u pynmih halor ka Citizenship Bil ka dei ka hukum ban iada ïa ki nongshongshnong ka Ri India haba kyntait ba ka hukum ba u pynmih ka dei ka buit Politics lane ba u don jingthmu ban rung sha ka kam Politics hadien ba u shongthait na ka kam.
Ka hukum u Justice SR Sen ba ong ba ka India ka dei ban dei ka Ri ki Hindu hadien ka jingïoh laitluid kumba ka Pakistan ka long ka Ri Islam, kala pynmih ïa ka jingkynthoh pyrshah kaba jur khamtam na ka CPI (M) kaba dawa ïa u Chief Justice ka India ban weng noh ïa u Justice S.R Sen na ka kam long nongbishar haba kynnoh ba ki jingkynthoh jong u ha ka hukum ki long pyrshah ïa kaei kaba la saiñdur ha ka Riti Synshar ka Ri.
“Nga la thoh ïa ka hukum jong nga ban iada ïa ki Nongshongshnong ka India khlem da kheiñ Jaidbynriew, Niam ne Ktien bad ki paidbah ki dei ban sngewthuh ïa ka histori jong ka India bad ban im ha ka suk ka saiñ” ong u Justice Sen ha ka kyrwoh jingpyn shai ba ai hynnin ka sngi thohdieng.
“Nga la pynpaw ruh ba ngam dei u shitniam bad nga burom ïa baroh ki jait niam namar ha nga U Blei u dei tang uwei” ong u Justice Sen haba ong ba ula ïoh khubor ba don kiba sngewthuh bakla ïa ka hukum ba u pynmih bad namar kata, ka long kaba dei eh ban weng noh ïa ki jingsngewthuh bakla na ka jingmut jingpyrkhat u paidbah.
Haba kyntait ba ka hukum ba u pynmih ka dei namar ka buit politics, u Justice Sen ula ong “Ngam shym la don bad kino kino ki Political Party lane nga don ka jingangnud ban shah thungkam lyngba ka Politics hadien ba nga shongthait bad ka hukum jong nga kam shym la ïakhleh Politics eiei ruh em lane don ba phah leh da kino kino ki Party”.
Ha ka 10 tarik Nohprah, u Justice Sen ula pynwai ïa ka mudui jong uwei u briew uba shah kyntait ban ïoh ïaka syrnot long nong shongshnong ba pura da ka Jylla Meghalaya bad kyntu ïa u Myntri Rangbah Duh ka Ri, u Myntri kam pohïing bad myntri kam aiñ nalor ka Myntri Rangbah ka West Bengal bad u Lat ka Jylla, ba kin wanrah ïa ka aiñ kaba ïasyriem kum ka Citizenship Bill khnang ban shah ïa ki paid Khasi Jaiñtia bad Garo ba na Bangladesh ba kin wan sah noh ha India nalor ki Hindu, ki Sikh, ki Jains, ki Budhist, ki Parsis bad ki Khristan.
U Justice Sen ula pynshai ba ka jingpynpaw jong u ïa ka Sorkar Kmie hapoh ka jingïalam jong u Myntri Rangbah Duh u Narendra Modi, ka thew lang ruh ïa baroh ki Myntri bad ki Dkhot jongka Ïingdorbar Lok Sabha bad Rajya Sabha. U ong ‘Ka jing kyrpad jong nga ka long ïa ki nongthaw policy bad nongthaw aiñ jong kane ka Ri. Nga ngeit skhem ba kane kan weng ïa ka jing sngewthuh bakla lada don ha ka jingmut jingpyrkhat u paidbah”.
Haba pynpaw ba ka jingburom ïa baroh ki jait Niam ka dei kawei na ki mat ba kongsan ha ka Riti Synshar ka Ri, u Justice Sen ula ong” Ym dei shuh ban nang phiah ïa ka Ri India tangna ka Niam, ka Jaidbynriew lane ka Ktien ka Thylliej”. Ula pynshai shuh shuh ba ha ka hukum ba u pynmih, ym shym la don satia ka jingkren ba pyrshah ïa ka jingburom ïa baroh ki jait niam hynrei kala kren tang ïa ka histori ïa kaba ym don satia ba lah ban pynkylla.