Press "Enter" to skip to content

24 kynta ai por ka MEMRIWU ïa ka GVK-EMRI ne yn pynlong jingïakhih

Shillong, Nohprah, 20: Ka Meghalaya EMRI Workers Union (MEMRIWU) kaba long ka synjuk jong ki nongtrei ka GVK EMRI, Meghalaya kiba kynthup ïa ki Paramedics bad ki Pilots ki la ai por tang 24 kynta ïa ki bor pynïaid jong ka GVK EMRI, Meghalaya ba kin pynurlong ïa ki jingdawa ha kaba ïadei bad ka jingsiew ïa ka tulop, ka jingai shuti, ka jingtrei tam ïa ka por trei bad kiwei kiwei.
U President ka Seng, u Bah Roypar Raswai, ha ka jingkren bad ki lad pathai khubor mynta ka sngi u la ong, “ngin pynlong beit da ka jingïakhih lada ki bor pynïaid jong ka GVK-EMRI, Meghalaya ka leh kyllut bad mynta ka sngi ngi la ai biang ïa ka shithi pynkynmaw sha ki bor pynïaid ka GVK-EMRI, Meghalaya ba kin jubab hapoh 24 kynta ïa ki mat jingdawa ba ngi la buh lyngba ka dorkhas la ar taiew mynshwa.”
Ha ka 6 tarik mynta u bnai, kane ka kynhun ki nongtrei ka GVK-EMRI, Meghalaya ka la aiti da ka dorkhas sha ki bor pynïaid. “Ngi sngewkhia ba ki bor pynïaid ki shu sngap mynthi wat hadien ba la kut ka
jingaipor ba kin jubab ïa ki jingdawa jong ngi,” ula bynrap.
“Balei ki bor pynïaid ka GVK-EMRI kim lah ban khot wat haba ngi la ai por haduh ar taiew. Haduh mynta wat tang shi kyntien ruh kim kren eiei na ka liang ki bor pynïaid,” la kynthoh une u nongïalam ka MEMRIWU.
Kawei na ki jingdawa ba shongnia jong kine ki nongtrei ka GVK-EMRI, Meghalaya ka long ban thung shuh shuh ïa ki Field Staff. “Ïa mynta hi ki Field Staff, kata, tang ki EMT bad ki Pilot ki don sa tang 204 ngut ha ka jylla Meghalaya baroh kawei. Ngi dawa na ki bor pynïaid ba ki dei ban thung shuh shuh ïa ki Field Staff sa 3 ngut ki Paramedics bad 3 ngut ki Pilot bad ki Reserves Staff namarba ngi shakri ïa ka kam ba ai jingïarap kyrkieh, hynrei lada ngi pang ngi shitom ka buh jingeh bha ïa ngi,” bynrap ka Vice President ka Seng, ka Kong Niewkor Dkhar.
“Wat ïa ka shuti Leave Encashment bad ïa ka Priviledge Leave ruh ki la pynduh noh,” ong kane ka Vice President ka Seng.
Ka General Secretaty ka MEMRIWU ka Susan Lyngdoh, haba bynrap halor kane, ka la ong, “ki don kiba la trei jin phra snem bad shiphew snem hynrei ki ïoh ïa ka jingsiew ka bym biang satia nalor ba ka rukom siew tulop kam long satia da ka lynti kaba shai namar ïa ka jingsiew tulop ki bor pynïaid ki shu pynshong nongrim katkum ka kam kaba ngi trei.”
Katkum ka jingïathuh kine ki nongïalam ka Seng, ki kali Ambulance ba ka GVK-EMRI ka pyntreikam ban shakri ïa ki paidbah ha Meghalaya ki dei kiba la rim bad ki dei kiba la pyndonkam naduh u snem 20009 mynba la pynbna paidbah ïa ka GVK-EMRI ha Meghalaya.
“Nalor ba ki dei ki kali kiba la rim naduh u snem 2009 ka buh jingma wat ïa u nongniah (Pilot) haba leit kit nongpang bad wat ïa ki nongpang,” la bynrap u Publicity Secretary ka Seng, u Bah Joseph Pyngrope.
Katkum ka jingïathuh jong kine ki nongïalam, ïa mynta ki kali Ambulance 108 kiba dang treikam ïa mynta ha ka jylla baroh kawei ki don sa tang 42 tylli katba 19 tylli ki dei kiba la jot bad kiba la sniew. Ki ïathuh ruh ba ka GVK-EMRI ka ju shim bujli noh ïa ki tiar na kine ki Ambulance ba la jot bad pyndait pat ha kine kiba dang bha.
“Ïa mynta hi ki Ambulance 108 ki shu ïaid ha surok tang ka jingsarong ba pah ka Siren,” la ong u Bah Joseph.
Ka MEMRIWU ka la dawa na ki bor pynïaid ban sangeh mardor ka jingpynkynriah kam ïa ki nongtrei. “Namarba ki bor pynïaid kim ïoh daw ban beh kam ïa ki nongtrei ki shu pynkynriah kam ïa ki nongtrei na East Khasi Hills sha ki jaka nongkyndong jong ka Garo Hills. Nalor ba ngim ïa sngewthuh ïa ka ktien ka thylliej, ki don ki para nongtrei kiba la hap ban iehnoh ïa ka kam. Kane ka dei ka buit behkam jong ka GVK-EMRI,” la kynnoh u Bah Joseph uba la shah pynkynriah kam mynta sha Garo Hills.
Ha kujuh ka por, ki la kyntu ïa u Dr. Donkupar Roy, uba long mynta u Lamphang ka Iingdorbar Thawaiñ ka Jylla ba un tuklar lem halor kane, namarba ïa ka Memorandum of Understanding (MoU) ka GVK-EMRI ka la ïasoi bad ka Sorkar Meghalaya ha u snem 2009 mynba u Dr. Donkupar u dang long u Myntri Rangbah ka Jylla.