Press "Enter" to skip to content

27 Rymphang elekshon jied MDC, 2 tarik Lber ka sngi ñiew

Shillong, Nohprah 20 : Ka sorkar jylla ha ka sngi Palei ka la pynbna ba ka elekshon jied MDC thymmai ha ki 29 tylli ki constituency jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) kan long ha ka 27tarik u Rymphang, 2019 katba ka sngi ñiew vote pat kan long ha ka 2 tarik u Lber, 2019.
Haba pyntip ïa kane hadien ka jingïalang jong ka kynhun Myntri, u Symbud Myntri Rangbah, Bah Prestone Tynsong u la ïathuh ruh ba ka jingthep kyrteng ki kyrtong kan sdang naduh ka sngi ba pynmih ïa ka jingpynbna (Notification), katba ka sngi ba khatduh ban thep kyrteng kan long ha ka7tarik Rymphang.
La ïathuh ruh ba ka jingbishar ïa ki kot ki sla jong ki kyrtong kan long ha ka 08tarik u Rymphang, katba ka jingailad ban weng kyrteng noh kum ki kyrtong kan dei ha ka 9 tarik u Rymphang hi.
“Ïa kane la mynjur da ka kynhun Myntri mynta ka sngi,’ ong u Symbud Myntri Rangbah. Haba bynrap shuh shuh u Bah Prestone u la ïathuh ruh ba ka Model Code of Conduct kan sdang noh naduh ka sngi ba pynmih ïa ka jingpynbna.