Press "Enter" to skip to content

Ha ka sien ba nyngkong eh pynkup burom ka KHADC ïa ki Nongthohkhubor

Shillong: Ka Khasi Hills Autonomous District Council lyngba ka Executive Committee ba la ïalam da u Bah HS Shylla, CEM, ka la pynlong ka jingpynkup burom ïa ki 19 ngut ki Nongthoh khubor, ha ka jingïalang kaba la pynlong ha Conference Hall, ha kaba la ïadonlang i Kong Teilinia Thangkhiew, Deputy CEM.
Kine ki 19 ngut ki Nongthohkhubor, kidei kiba la ju noh synñiang sha ka ri bad jaidbynriew ha kine ki shiphew snem tam ba la leit lyngba ka jinglum khubor jong ki ha ka por ba ka District Council ka pynlong ïa ka dorbar bad kiwei kiwei de ki kam jong ka Council.
“Kane ka dei ka dak ka jingsngewnguh jong ka District Council, ïa ka jingïarap lem jong phi ïa ngi ban pathai ïa ki khubor, khamtam eh ha ka por ba ngi long dorbar”, la ong u Bah Shylla, haba kren ha ka jingïalang kaba lyngkot. U la ong ruh ba kumba ki lad pathai khubor kidei u païa ba saw jong ka jingsynshar paidbah ha ri India, ym don mano mano ba lah ban ibeiñ ne kheiñ beiñ ïa ki.
U CEM ruh u la ong ba kane kadei ka jingsdang bad ka long ruh ka jingplie lynti na ka bynta ka jingithuh kaba khambha ïa ka jingshakri ki lad pathai khubor ha ki snem ban wan. U kyrmen ruh ba kiwei pat ki District Council bad khamtam eh ka sorkar jylla kan leh eiei na ka bynta ka bha ka miat ki Nongthohkhubor ha ka jylla
I Kong Teilinia iba la donkti bha ha kaba pynlong kam ïa kane ka jingpynkup burom, i la pynpaw ka jingsngewkmen ba ïa kane ka jingangnud ba ka slem ka Council mynta la lah ban pynurlong. I la ai khublei ruh ïa ki Nongthohkhubor kiba la ju ïarap ïa ka District Council na ka por sha ka por.
Na ka liang ki Nongthohkhubor la ïoh jingkren na u Bah P. Sohkhlet, General Secretary ka Shillong Press Club, uba la ong ha ki 24 snem ba u la shakri kum u Nongthohkhubor, kane ka dei ka sien kaba nyngkong ba ki la ïoh jingithuh ne ka jingleh burom. U la ai khublei ïa u CEM, ïa ka EC bad ïa baroh ki MDC kiba la shim ïa kane ka sienjam ban ithuh bad ai burom ïa ka jingshakri ba jar jar hynrei kaba eh jong ki Nongthohkhubor. “Kane ka jingleh jong phi ka Council ka long kum ka jingthap met ïa ka jinglehbha na ka bynta jong phi”, u la ong. U Bah Sohkhlet u kyrmen ruh ba kane kan nym long ka sien kaba nyngkong ba ka KHADC kan leh burom ïa ki Nongthohkhubor, hynrei kan ïai bteng na ka snem sha ka snem na ka bynta kiwei pat ki Nongthohkhubor kiba don ha ka jylla.
La ïoh jingkren ruh na u Bah S.Pdahkasiej, Bah Kong Evanjoplin Dkhar, Bah Bhabok Laloo, Bah Gershom Hat bad Bah Section Syiemlieh.