Press "Enter" to skip to content

Lum u Syiem Marwet ïa ki paidbah ba thmu die jaka ki riewshimet sha ki shipai

Nongpoh, Nohprah 20: Kumba ha kine ki sngi kila mih ki kynrum ki kynram kiba la pynsngewthuh bakla ïa ki paidbah halor ka jingthmu shim jaka ki shipai bad ba la don ruh ka jingpyrshah da ki paidbah bad ki kynhun Seng Bhalang na Ri Bhoi, na ka liang u Syiem ka Raid Marwet ryngkat ki myntri na ka Hima Mylliem ki la hiar sha ka Shnong Pilangku A ban pynlong ïa ka jingïalang paidbah na ka bynta ban ïa kren halor kitei ki kam ban nym mih kano kano ka jinghuri hura kaba lah ban ktah ïa ka shnongsuk ka shongsain ki paidbah.
Nalor u Syiem ka Raid Marwet, u Paiem Ken Syiem, ha kane ka jingïalang la don ryngkat ruh na ka Hima Mylliem ba kynthup ïa u Bah Stephan Nongneng, u Basan Nongumlong, u Bah B.H Pathaw, Myntri ba dei peit ïa ka Elaka na ka Hima Mylliem bad kynthup ruh ki paidbah nongshong Shnong bad ruh la sakhi lang ruh da ka jingdon lang ki nongïalam ka HNYF, Northern Region ha ka jingïalam u Bah Marcus Marten kum u President.
Ka jingpynlong ïa kane ka jingïalang ka long ruh ban pynshai halor kata ka jingthmu shim jaka ki shipai kaba ki paidbah haduh mynta ki dang sah ha ka umdum bad ka jingthmu ba kyrpang hi jong u syiem ka long ban pynshisha la kata ka jingshim jaka ki shipai ka dei shisha bad ka don neem kata ka jingktah ïa ki paidbah kumba la mih ka jingpyrshah.
U Pa’iem Ken Syiem u la ong ba ka Raid Marwet kan thung noh da ka Committee ban tip bniah halor kane ka jingthmu shim jaka ki shipai bad ruh lyngba katei ka Committee kin sa pynlong ruh ka jingjurip ïa kita ki jaka ba thmu shim ki shipai la ka dei shisha neem ba ka ktah ïa ki paidbah.
U la ong ruh ïa mynta hi ka Raid Marwet kam pat ai kano kano ka rai la yn pdiang ne pyrshah ïa katei ka jingthmu shim jaka ki shipai, hynrei kum ka Raid kaba peit ïa ka bha ka miat bad ka roi ka par ki padibah ka hap ban bishar bin pa bin la kata ka jingpyrshah ki paidbah ka dei hok neem ba ka ktah ïa ki jaka rep ne ki Shnong ki thaw.
Kumba la kynnoh ba ka don ka jingdie tuh jaka sha ki riew shimet ba la kam da ki katto katne ngut ha katei ka thaiñ khappud, u Paiem Ken Syiem u laong ba ka Raid Marwet lyngba katei ka Committee kan bishar bniah la ka don neem kata ka jingdie tuh jaka sha ki riew shimet bad ruh ka Committee hi kan jurip lut ïa baorh ki jaka khnang ban tip tynrai halor katei ka jingthmu shim jaka ki shipai.