Press "Enter" to skip to content

Pynjynsur ka sorkar ïa ki kyndon ban ïoh Mining Lease bad Quarry Permit

Hadien khyndiat sngi ba mih paidbah ki nongtih maw
Shillong, Nohprah 20 : Ka sorkar jylla ha ka sngi Palei ka la pynbna ba ka la pynkylla ïa ki kyndon jong ka Meghalaya Minor Minerals Concession Rules, 2016 khnang ban pynsuk ïa kito kiba aplai ban ïoh ïa ki Quarry Permit ne ka Mining Lease.
Katei ka rai ba ka sorkar ka shim kadei hadien khyndiat sngi ba da ki hajar ngut ki paidbah ba im da ka tih bad shoh maw kumjuh kito ba trei ha ki jaka tylliaw maw na East Khas Hills ki lamih ryntih ban pyrshah ïa ka rai jong ka sorkar ban khang noh ïa ka jingtih maw ne kor tylliat maw kiba treikam khlem da ïoh ïa ki Mining Lease lane ki NoC na ka sorkar jylla.
Hynrei, katkum jingïathuh jong u Symbud Myntri Rangbah ka Jylla, Bah Prestone Tynsong hadien ka jingïalang jong ka kynhun Myntri, la ong ba ki paidbah mynta kim donkam shuh ban bunkam ne leit kyllaiñ kumba long mynshwa ban ïoh ïa ki permit lane ki mining lease ban bteng ïa ka kam tih mawpoh khyndew jong ki.
U la ong ruh ba ka jingwanrah ïa katei ka Amendment ha
katei ka Rules kadei hadien ba ki lap ba ki paidbah ki shem shitom bha ban ïoh ïa kitei ki jingbit khamtam eh ban ïoh ïa ka Non-Forest certificate namar hap ïaid jrong bha, kata naduh Ranger haduh PCCF.
“Hynrei mynta pat la kdew katkum ka jingheh jong ka jaka,kata ba kito kiba hapoh 5 hectare ka jaka tih, ka sorkar ka la aibor ha ki Divisional Forest Officer Territorial ba kin ai ïa ki Non-Forest Certificate sha ki paidbah ba aplai,” u la ong. Halor ki Mining Lease bad Quarry Permit, u Symbud Myntri Rangbah u la ong ba mynshwa ki paidbah ki hap banïoh shwa ïa ka No Objection Certificate (NoC) na ki District Council hynrei mynta pat ka sorkar ka la rai ba na ka bynta ki trai muluk trai jaka, kim donkam shuh ban ïoh ïa katei ka NoC na ki District Council.
“Hynrei na bynta kito ki nongaplai bym dei riewlum ne ki kompeni, ki hap ban ïoh shwa ïa ka NoC na ka District Council,” u la bynrap biang. Shuh shuh u la ong ruh ba ka sorkar ban pynsuk ïa ki paidbah, ka la rai ruh ban pynkupbor ha ki Divisional Mining Officer ban mynjur ïa ki MiningPlan. U la ong ruh ba mynta ki paidbah kim da donkam shuh ban wan shaduh Shillong ban ïoh ïa ka jingmynjur ïa ki mining plan jongki, namar ïa katei ka kam ki lah ban pyndep ha ka thaiñ jong ki hi.
Shuh shuh u ong ruh ba mynta kito ki nongaplai kim donkam shuh ban leit shaduh Labour Department ban ïoh ïa ka NoC hynrei mynta ki lah ban leh lyngba ka ‘Self Declaration Form’.