Press "Enter" to skip to content

Ujor ka Amita halor ka dur jong u Conrad bad u Nidamon Chullet

Shillong: Ka Amita Sangma, kawei na ki longkmie ba la shah shoh ha Tuber Soshshrieh ha ka 8 tarik u Naiwieng, ka la ujor sha ka ïingbishar Meghalaya High Court halor ka jingbym ïaid shaphrang ka jingtohkit, na ka daw ka jingïadonkti ki heh Pulit bad ki nongkhaïi dewïong bad katto katne ki riewsaiñ pyrthei.
Ka Amita ka kdew kyrpang ïa ka dur jong u Bah Nidamon Chullet, President ka NPP Jaiñtia Hills, uba la ïashon dur lang bad u Conrad Sangma, Myntri Rangbah ka jylla. U Nidamon udei uba ki Pulit ki la jer kyrteng kum u nongïalam ba hakhmat eh ban ïalam ìa ki paidbah ban thombor ïa ka Amita bad Kong Agnes ha katei ka jingjia.
“Kane ka jingujor ka la pynpaw ba kumno u Myntri Rangbah u lah ban ïashon dur lang bad une u briew uba thmu ban pynïap ïa ki kynthei”, la ong ka Amita ha ka jingujor.
Dei namar kane ka daw ka la ïaiban ba dei ban aiti ïa kane ka jingtohkit sha ki kynhun kiba kham tbit, namar ba ki Pulit hangne kin nym nud ban tohkit bniah, namar ka jingdonkti ki riewsaiñ pyrthei ha kam khaïi dewïong beaiñ.
Ka High Court ha ka sngi balang, ka la maham tyngeh ïa ki Pulit ba lada ka lap ïa kano kano ka jingsynjor ha ka jingtohkit kan leh da kaba tyngeh ïa ki. Ka la banjur tyngeh ruh ba kane ka jingtohkit kan hap ha ka jingpeitngor ka ïingbishar.