Press "Enter" to skip to content

Wan poi u Addl.CE ka tnad dewïong ha Lumthari ban ïarap ïa ki lanot

Pyntikna bym don jingma ka tih dewiong ha EJH
Khliehriat, Nohprah, 20: Ka jinglong jingman ha Ksan, Lumthari kat haduh mynta ym pat lah ban leh ei ei ruh watla ki lad ai jingïarap ki la wan na shabar ruh, kiba kynthup ruh u Addl.Chief Engineer of Coal na West Bengal, u S. Jaswant Singh uba dei u riew don jingtip batbit uba don jingtip bha ha ka kam tih dewiong uba la pyllait im ïa ki 64 ngut ha Raniganj, kaba ïa syriem kum kane ka jingjia ha Lumthari, East Jaiñtia Hills Districrt.
Ka haduh mynta, ka jingkiew ka um ka dang long hi kumjuh bad la pyndonkam tang ar tylli ki mashin tan um.
Ha kaba ïakren bad ki lad pathai khubor mynta ka sngi ha Lumthari, u S. Jaswant Singh, u la ong ba ka jingtih dewiong ha kane ka District kam don jingma eiei ruh haba ïanujor bad ka ri China. U la ïathuh ba ha China kumba ar phewsan hajar ngut ki briew ki ju ïap ha kaba tih dewiong katba ha ri India pat ym ju don wat tang arphwsan ngut ruh. U pyntikna ruh ba ka rukom tih dewiong ka long ka bym da buh jingma than haduh katta katta ïa ka jingim briew bad kane ka jingjia kaba la jia ha Lumthari ka leit jia kumne dei tang na ka daw ka jingdap ka um.
U la ong ruh ba ka rukom ai jingïarap ha kane ka kynti ruh ka long ha ka rukom kaba biang bha.
Haba kylli, u Jaswant Singh, u la ong, “tat haduh ka minit kaba khatduh yn sa lah ban batai la kiba sahkut hapoh krem kin dang im ne ki la lap bad nga khmihlynti ba ka kam kan long kaba jop.”
Haba ïakren bad ki bahaïing hasem jong ki lanot ba sahkut ha krem,u Bah Sngewlem Dkhar uba dei u Mama jong ki ar ngut ki lanot kiba kynthup u Milan Dkhar, 22 snem bad u Jimon Dkhar, 20 snem kiba dei shipara trai, u la ïathuh ba kine ki pyrsa jong u kim banse ban trei ïa kane ka kam namar ka jingthngan bad ym don shuh da kiwei pat ki lad kamai sa kawei ruh haba don kiba khot trei bylla ym banse ban trei namar ka jingduk ha iing ha sem bad kumjuh ruh dei kine ki samla kiba ju pyndap pynbiang ïa ki jingdonkam jong ki ha ïing hasem namar u kpa jong ki u la khladnoh bad ka kmie ruh ka don hapdeng ka jingshitom bad ki don ruh ar ngut ki para kynthei kiba dang rit ha iing..
U la pynpaw ka jingsngewkhia kaba jur bad sngewsih ruh halor kane ka jingjia kaba la wan lynshop ha ka ïing ka sem
Haba ïakren bad u Bah Kletes Chyrmang,u Kpa jong u Chalabas Dkhar, 20 snem ka rta, u la pynpaw ka jingsngewsih halor kane ka jingjia ïa u khun jong u bad ong ba u khun u trei ïa kane ka kam dei na ka daw ka jingkyrduhkam watla ki la pyrshang ban leh ïa ka rep ka riang ruh hynrei ka kam rep kam lah ban pyndap ïa ki jingdonkam ha ïing ha sem.
Ka jingangnud jong ki bahaiing hasem jong ki lanot mynta ka long tang ban ïoh ïa ka met ka la biang.