Press "Enter" to skip to content

Yn ap ka MCCLEU ïa ka rai ba mih na ka jingïakren u CM bad ka Management

Shillong, Nohprah, 20: Ki nongtrei ka MCCL kiba don haoh ka shatri jong ka Mawmluh Cherra Limited Employees Union (MCCLEU) ki la rai ban ap shwa ïa ka rai kaba mih na ka jingïakren hapdeng u Myntri Rangbah ka Jylla bad ki bor pynïaid ka MCCL ha kaba ïadei bad ka jingdawa ïa ka tulop kaba sah pongding la 8 bnai kynthih bad ïa ka jingsiew kaba ki trei tam na ka por ba la buh.
U President ka Seng, u Bah S. Diengdoh ha ka jingkren bad ki lad pathai khubor hadien ka jingïakynduh ïa u Myntri Rangbah ka jylla, u Conrad K. Sangma hapoh ka jingïalam jong u MLA barim ka Sohra Constituency, u Bah Titos Chyne, u la ong, “ïa mynta ngin ap shwa kaei ka rai kaba mih na ka jingïakren lashai ka sngi thohdieng hapdeng u Myntri Rangbah bad ki bor pynïaid ka MCCL bad hadien kata ngin sa shim ïa ka rai la ngin weng noh ne ngin da bteng ïa ka jingïakhih namar u Myntri Rangbah u la ïathuh hakhmat jong ngi ba un sa ai jingtip ïa ngi hapoh ar ne lai sngi.”
Ka MCCLEU mynta ka sngi palei ka la pynlong da ka jingïashong kyllaiñ myngor ha Parking Lot kaba don markhap bad ka ophis Addl. Secretariat, Shillong kum ka jingpyrshah halor ka jingbym ïoh ïa ka tulop kaba la phra bnai kynthih bad ka jingbym siew ka Sorkar ïa ki jingsiew ba ki dei ban ïoh kum ki nongtrei.
Katkum ka jingïathuh jong une u nongïalam ka MCCLEU, ki nongtrei jong kane ka Karkhana pynmih dewbilat ba la rim tam ha ka Jylla kaba don ha Mawmluh, kim shym la ïoh satia ka tulop kaba phra bnai, kata, naduh u bnai Nailar, 2015 haduh Lber, 2016 bad ka jingsiew ïa ka bai trei palat por (overtime) kaba la sah pongding naduh u snem 2013 haduh mynta.
Ka jingbym shimkhia jong ka Sorkar Jylla ïa kane ka Karkhana pynmih dewbilat kaba la pang swai, ka la ktah jur bha ïa ki 240 spah ngut ki nongtrei bapura (permanent staff) bad kumjuh ruh wat ïa ki Casual Labour bad ki Trainees ba la thung da ka kompani kiba don kumba 450 spah tam eiei.
Une u nongïalam ka MCCLEU u la ïathuh ruh ba ka seng ka la ju pynsngew ïa ka jingeh naduh mynshwa wat ha u MLA bad MDC ka Sohra bad ha u MLA ka Shella halor ka jingïakynduh mawsiang na ka jingbym shimkhia jong ka Sorkar.
Dang shen, kane ka kynhun ki nongtrei ka MCCL ka la phah ïa ki 14 tylli ki mat jingdawa sha ka Sorkar Jylla, ba kynthup ïa ka jingbym ïoh tulop, ka jingbym don ki lad jingïada ïa ki nongtrei hapoh ka Karkhana bad kiwei kiwei ki lad jingmyntoi ba ka Sorkar ka dei ban pynbiang kumba long sha kiwei pat ki karkhana kiba don ha rilum Jaiñtia.
Ha kaba ïadei bad ka jingpynlong ïa ka jingïakhih, une u nongïalam ka MCCLEU la ong, “ngim banse ban mih shakhmat namar ngi la ïaishah ïa kine ki jingeh naduh u snem 2013 namar ngim shym la ïaid lait ïa ka Management bad ngi ladep pynsngew ruh wat ha ki Nongmihkhmat ka Sohra bad Shella ba kin shimkhia lem halor kane ka jingeh ba ngi ïakynduh.
U Bah Diengdoh, u la ong shuh shuh, lada ka Sorkar ka da angnud shisha ban pyntreikam pura ïa kane ka karkhana ka dei ban pynkylla ïa ka rukom treikam kaba rim sha kaba thymmai bad ban bujli ruh wat ïa ki mashin bad kiwei kiwei ki tiar ba la tor hapoh ka karkhana.