Press "Enter" to skip to content

2018 u snem ka jingtynjuh ïa ka sorkar ba dang lung

Shillong, Nohprah 30: Ka snem 2018, ka la sdang da ka jingkmen na ka bynta ka Party NPP, UDP, PDF,HSPDP, BJP bad NCP, namar ba kine ki Party hadien ka elekshon 2018, ki la ïoh ban thaw ïa ka sorkar ha Meghalaya hapoh ka shatri jong ka Meghalaya Democratic Alliance(MDA).
Hadien ba la shimti da kane ka kynhun ïa ka bor synshar,kiba bun ki paidbah ki la pdiang sngewbha bad khmih lynti ïa kiei kiei kiba bha, namar kadei ka sien kaba nyngkong hadien kumba shiphew snem la wan biang ka sorkar bym dei ba ïalam da ka Seng Congress.
U Conrad Sangma, uba la shimti kum u Myntri Rangbah, wat haba um shym la shah jied kum u MLA ruh, u la ïalam ïa ka sorkar kaba lah ban ong ba ka long kawei na ki sorkar kaba dang khynnah (One of the Youngest Ministry)namar ba ki don ki Myntri ha ka sorkar kiba dang khynnah, kynthup ïa kiba dang 27 snem ruh. Kadei ruh ha ka sorkar ha kaba kiba bun ki dang dei kiba dang thymmai ha ka kynhun Myntri, namar ki dang jop ha ka sien kaba nyngkong kum ki MLA.
Hynrei tang hadien ar bnai ba ka sorkar ka la shimti ïa ka bor, ka la hap ban mad ïa ka jingtynjuh kaba khraw, haba la bthe ka jingïakhih paidbah halor ka Them Metor. Kane ka jingjia kaba la jia na ka daw ka jingshah ktah kti ki
lai ngut ki samla ha ki khar metor, ka la kylla long ka jingïakhih kaba jur, kaba la neh haduh san sngi lynter bad sngi bad miet. Ka nongbah Shillong, ka la ngat ha ka jingpynajri curfew ha ki katto katne ki bynta bad ki don ruh kiba la pynjari ïa ka Curfew khlem buh por. Kane ka la jia ha ki taiew ba khatduh jong u bnai Jymmang.
U Conrad Sangma bad ka kynhun ba dang lung jong u, ki la mad ïa ka jingshah tynjuh, kumno yn weng ïa kane ka jingeh, kaba la iehnoh la slem da ki sorkar kiba ladep, kata ka long ban pynkynriah noh ïa ka them metor na ka Them Iewmawlong. Ka sorkar ka la lah ban pynkohnguh ïa ka jingiakhih paidbah hadien ba la thung ïa ka High Level Committee ba la khlieh da u Bah Prestone Tynsong, Deputy Chief Minister. Kane ka kam ka dang sah haduh mynta.
Shuwa ban kut jong ka snem pat, ka sorkar u Conrad, ka la mad sa kawei pat ka jingshah tynjuh bad kane kadei na ka daw jong u dewïong. Kaba nyngkong kadei ka jingshah thombor jong ki arngut ki longkmie, I Kong Agnes Kharshiing bad ka Amita Sangma ha Sohshrieh, East Jaintia Hills. Kane ka jingjia kaba la kiew ruh haduh ki rynsan jong ki National Media, ka la buh jingeh ia ka sorkar kumno ban pynjem ia ka jingkyan kaba jur napoh napoh napoh. Ka jingtohkit ki Pulit ha kaba iadei bad kane ka kam ka dang iaid haduh mynta.
Sa kawei pat ka jingeh ba ka sorkar MDA ba dang lung, ka la mad, kadei ka jingshah tep im ki 15 ngut ki nongtih dewïong ha ka kren dewiong ha Lum Thari, East Jaintia Hills. Kane ka jingjia sa shisien pat ka la kiew rynsan ha ki National Media bad International Media. Ka la buh jingeh bad pynktha khlieh ia ka sorkar MDA namar ba wat hadien artaiew ruh ym pat lah sei ia kine ki briew, kiba mynta hi bun ki la duh jingkyrmen ba kin dan lait im. Ka jingbym lah ka sorkar jylla ban sei ia kine ki briew, ka la pynlong ia ka sorkar pdeng ban pan ia ka jingïarap ki shipai duriaw, ki shipai suiñ, kiba haduh ba thoh ïa kane ka jingthoh ki dang ïakhun ha krem Lumthari ban sei ïa kine ki briew shabar.
Ka snem 2018, kadei ka snem ha kaba ka jylla, ka la mad bun tylli ki bye election sha ïingdorbar Thawaiñ, na ka daw ka jingiehnoh kam ki MLA ba dang shah jied thymmai.