Press "Enter" to skip to content

Da u Bah Sherbor, sei ka HSPDP kum u kyrtong MDC na Sohïong constituency

Ka pisa kam dei ka thapniang ban long MDC : Pangniang
Shillong, Nohprah 30 : Baroh ki primary unit jong ka HSPDP Sohiong – Nongspung constituency ha ka sngi Saitjaiñ da kawei ka sur ki la mynjur ïa u Bah Sherborlang Lyngdoh Mawlong kum u kyrtong ban aireng ha ka elekshon MDC kaban long ha u Rymphang mynta u snem.
Ha katei ka jingïalang pynskhem ïa u kyrtong kaba long ha Mawmaram la don lang ruh naduh u President Rangbah ka HSPDP, Bah KP Pangniang, nangta u Chief Organiser ka Party, Bah Samlin Malngiang uba dei ruh u MLA,MDC ka Sohïong nalor ki kyrtong jong ka party na kylleng kylleng.
Na ka liang u President haba kren hadien ba la pynskhem ïa u Bah Sherbor kum u kyrtong, u la ong ba lada baroh ki unit ki treilang kam don jingeh ei ei ïa utei u rangbah ban jop suk ha katei ka elekshon MDC. U la ong ruh ba ki khmih lynti ba ha une u snem ba ka party ka dang rakhe ïa ka jingdap 50 snem, ki paidbah ka Sohiong kin nang pynskhem shuh shuh ïa ka ktem Sing da kaba sei sa uwei pat u rangkynsai ban long u nongmihkhmat sha KHADC.
“Ka long kaba sngewkmen ban ïohi ba baroh ki primary unit ki mih markhmat ban kular ba kin trei shitom ban pynjop ïa u kyrtong. Ngim pat ïohi ba kiwei pat ki party kin da don kum kine ki jingïalang kiba heh ban pynbna paidbah ïa u kyrtong,” bynrap shuh shuh u Bah Pangniang da kaba ïaroh ruh ïa ki hajar ngut ki nongkyrshan kiba mih ban pynpaw ba kin trei borbah ban pynjop donburom ïa u Bah Sherbor.
Utei u President u la ong ruh ba ki paid Sohiong kidei kiba shemphang namar ki jied kyrtong da u briew uba la dei lypa u Rangbah Shnong, uba la tip khambha ïa ka kamram kaba ïadei bad ka synshar ka khadar, ka jinglong kyrpang ka Jaidbynriew, ka longkur long jait bad khamtam eh haba ïadei bad ka khyndew ka shyiap. U la ong ruh ba ka HSPDP hi kam pdiang satia ba ka pisa kan long kum ka thapniang ban jop suk kum MDC, MLA ne MP.
U da ai nuksa ruh ba kumno u Bah Samlin Malngiang da ka jingieid u paidbah u la jop suk ha ka elekshon MDC kumjuh ruh ha ka elekshon MLA da kaba pynliem ïa u MLA ba la jop la bun phew snem nalor ba u la bat ruh da ki phew phew snem ïa ka shuki Myntri sorkar ka jylla.
Ha kajuh ka por u la ong ruh ba ki don ka jingkyrmen ba ka HSPDP kan ïoh ruh wat ban thaw ïa ka Executive Committee ha KHADC ha kane ka samoi ban wan.
Na ka liang u Bah Samlin kum u MLA ka thaiñ u la ong ba katei ka jingryntih jong ki nongkyrshan ka HSPDP ha Sohiong ka la dei lypa ka jingkyrmen ba u MDC ba thymmai ka Sohiong un dei biang na ka HSPDP. Ha kajuh ka por u la ïaroh ïa u kyrtong uba la trei shitom naduh ka elekshon MLA.
“Nga kmen ba ryngkat ki nongïalam ka party ngi la rai hakhmat u paidbah ban jied ïa u kyrtong. Dei maphi ki paidbah ba jied ïa u kyrtong bad ruh dei maphi ban pynjop ïa u,” la bynrap biang u Bah Samlin da kaba pynpaw ruh ba ki paid Sohiong kidei kiba proh namar ki kyntait ïa ki bor pisa bad pynliem kylla ïa ki kyrtong kiba theh da ki klur. Nalorkata, u ong ruh ba ka Shnong Mawmaram kadei ban sngew sarong bad ba kadei ban kyrshan borbah ïa u khun jong ka shnong uba mih ban ïa khun ha kane ka elekshon.
Na ka liang u Bah Sherbor pat u la kyntu ïa ki paidbah ba kin klet noh ïa ka elekshon ba la dep hynrei ba kin wan ban treilang mynta ha ka HSPDP khnang ban poi sha ka thong. U la ong ruh ba kum u briew uba thrang ban shakri ïa ki paidbah, u da thrang ban ïoh ïa katei ka lad ban shakri khambha kum u nongmihkhmat.
“Lada u Blei u ibit ïanga kum u MDC, phin sa ïohi kaei kaba ngan trei na ka bynta ka Sohiong – Nongspung constituency,” u la ong.
Shwa ban pynskhem ïa u kyrtong, la ïoh ruh ïa ka jingkren na jan baroh ki nongïalam jong ki primary unit kiba hap ha katei ka constituency kiba la pynpaw ba kin trei shitom ban pynjop donburom ïa utei u rangbah.