Press "Enter" to skip to content

Durut ki Indian Navy bad NDRF ban ïoh sei kiba shah tep im ha krem Khloo Ryngksan

Khliehriat, Nohprah, 30: Ka kynhun jong ki shipai Indian Navy bad ki Pulit ka National Disaster Res ponse Force (NDRF) mynta ka sngi u Blei ki la ïakhun dukhi khait da kaba pyndonkam ïa ki mashin tan um ba la wanrah kyrpang ban ïoh sei ïa ki 15 ngut ki nongtih dewiong kiba la sahkut ha ka krem tih dewiong ha Khloo Ryngksan, East Jaiñtia Hill District naduh ka 13 tarik mynta u bnai Nohprah.
Haduh mynta ki shipai Indian Navy bad ki Pulit NDRF ki sdang ïa ka jingngam um kumba 70 phut ha Khloo Ryngksan ban wad ïa ki briew kiba dang sahkut haduh mynta hapoh krem dewiong hynrei kaba sngewsih ka long haduh mynta kim pat ïohi dak eiei ruh em bad la ïathuh ba imat ka um ka dang don sa kumba duna 100 phut shapoh jong ka krem.
U Superintendent of Police ka East Jaiñtia Hills, Bah S. Nongtnger u la ïathuh ba la dep ban tan ïa ka um napoh kane ka krem kumba 20 lak litar hynrei watla kata ruh ka um ka dang bun bha bad ka jingtan ïa ka um ka dang ïai bteng haduh mynta.
U la ïathuh ruh ba yn sa tih noh da kawei ka thliew ban pynlang ïa ka um khnang ba ka um kan ym tuid pathar.
U A.K.Bhorali, General Manager jong ka Coal Ltd Kolkata,u la ïathuh ba ki mashin tan um ki don 10 tylli bad kin dang wan poi shuh shuh ha kaba hynriew tylli ki dang don ha lynti bad kawei ka mashin kan poi lashai.
Ha ka jingpyntrei kam ïa ki mashin tan um kiba heh,u A.K.Bhaorali u la ong ba donkam ban don kawei ka rynsan kaba khlaiñbor ban pynieng ïa ki mashin. U la ong ba kane ka rynsan ka dei kawei kaba ki donkam eh, namar ïa ki mashin tan um yn sa pynngam shapoh um ban sei ïa ka um shabar lyngba ki pipe kiba heh.
Haduh mynta, u la ïathuh, ba u dang dang pynlong ïa ka jing jurip ban lap sa ïa kiwei kiwei ki thliew dewiong ruh ïoh lehse kin don ka jingïasnoh lang bad kane ka thliew kine ki lanot ki la sahkut bad lada lap ïa kita kiwei ruh ki thliew yn tan noh ïa ka um khnang ba ka um kan hiar stet na ka jingshlei hapoh ka krem tih dewiong ba sahkut ki lanot.
U la ïathuh ruh ba mynta ki la don ruh sa ar kynhun ki tnat ai jingïarap, kata 22 ngut na Ranchi bad 11 ngut na Dhanbad. U Santosh.K.Singh, Assistant Commandant jong ka tnat NDRF,u la ong, “mynta ka jingtreikam ka la nang ïaid shakhmat da ka jingwan poi ki shipai Indian Navy, lada yn lah ban poi haduh trai jong ka thliew lei kan kham bha shibun eh. Kane ka dei ka jingïatreilang hapdeng ki pulit NDRF bad ki shipai ka kynhn Indian Navy.”
“Ka long kaba eh ban ong ei ei ïa mynta hi tat haduh ban da lah ban ïoh ïa ka rynsan kaba biang ban pynieng ïa ki kor ki bor ban peit bniah ïa ka jingkiew jinghiar ka um bad ngi khmihlynti ba kane ka jingïatreilang kan long kaba jop ynda la lah ban pyntreikam lut ïa ki mashin,” la ong une u Assistant Commandant jong ka tnat NDRF.