Press "Enter" to skip to content

Ïakhun ban ïada ïa ka jaidbynriew ka jingsniew bad ka jingdum jingsah biej

Shongkun ka lyngkhuh sngi ïap ba 156 u Kiang Nangbah
Jowai, Nohprah 30: Ka jingkynmaw burom ïa ka lyngkhuh snem sngi ïap ba 156 u Kiang Nangbah-Khlawait ki Pnar kaba la long ha madan Madiah Kmai Blai, Syntu ksiar ka long kaba shongkun haba kaba da ki spah spah ngut ki riew paidbah, ki sengbhalang, ki riew rangbah, ki sahep sorkar ki la wan ban ïa snohkti lang bad ka Jaiñtia Iasiat Khnam Kiang Nangbah Memorial Society, Jowai (JIKNMSJ) kaba la pynkreh ïa kane ka jingrakhe kynmaw burom man la u snem ha katei ka jaka.
Nalor Jaiñtia Ïasiat Khnam Kiang Nangbah Memorial Society la kynmaw burom ïaka sngi ïap U Kiang Nangbah da ka Seiñraij Jowai ha Mynkoi Pyrdi bad ka All Jaiñtia Youth Welfare Organisation ha Khliehriat, East Jaiñtia Hills District.
Ha Mynkoi Pyrdi Ïongpiah u Bah Hamletson Dohling, Myntri Pynroi Sor jong ka sorkar Jylla ula long u kongsan haka jingïadonlang u Ma Phervision Nongtdu Principal Jaiñtia Eastern College, Khliehriat kum u symbud kongsan bad kiwei kiwei ha ka jingïalang kaba la pynïaid da u Ma OR Challam President Seiñraij Jowai.
La leit ban buh syntiew ha u mot Kiang Nangbah ba don ha Lum Mooliksoo. Ha kane ka juh ka prorkam u Bah Hamlet Dohling ula pyllait paidbah iaka Documentary Film shaphang ka jingim jinglong u Kiang Nangbah kaba la pynmih da ka Seiñraij Jowai.
U Kiang Nangbah u dei u khlawait ka jaidbynriew Pnar uba la len lade bad aiti ïaka jingim na ka bynta ka Ri jaidbynriew Pnar kaba la pynlong ba ngin ïoh ka jinglaitluid bad ban ïoh ha kaban pynneh pynsah ïaka riti ka dustur, ka kolshor bad ban ïada ïaka khyndew ka shyiap nalor ba phi lait na khajna naka sorkar phareng.
Ka jingaiti jong u (Kiang Nangbah) ïa ka mynsiem na ka bynta ka ri bad ka jaidbynriew kadei ka jingsynñiang kaba khraw jong u sha ka imlang ka sahlang, kumta uwei pa uwei ki dei ban bud ïaka dienjat jong u Woh Kiang Nangbah bad ban rat dyngkhong ïaka jingsniew haka imlang ka sahlang ban jop ïaka jingmylien ba sniew kum haka drok, kyiad, ban rat dyngkong ïaka jingbiej, ka jingduk bad ka jingpang la ong u DC West Jaiñtia Hills District u Ma Garod LSN Dykes.
U ma Madonbai Rymbai, Chief Executive Member JHADC ula ong ba ngi dei ban bud ïaki nuksa ba bha jong u Kiang Nangbah ban ïakhun ïaka jingsniew ka imlang ka sahlang. “Ngi la ïoh ka jinglaitluid na u dohlieh, hynrei kaba kongsan ka dei ban ïakhun ka jingpang ba bunjait ka imlang ka sahlang khnang ba wan ka roi ka par bad ban ïatreilang bad ka sorkar ha kano kano ki kam pynroi”.
La buh syntiew ha u mot sahnam u Kiang Nangbah ha kaba la ïa shim bynta da ki nongïalam bad ki dkhot sengbhalang bapher bapher ba kynthup iaka JSU, JYF, KSU, JSM, MPUF, HYC nalor u MLA ka Shillong North u Adelbert Nongrum.
La pynshongshit ïaka prokram da ka jingrwai jingshad tynrai ba la ïa shim bynta da ka kynhun jong ki dong bapher bapher bad ha baroh ar tylli ki jingialang la sam ia ki khusnam sha ki nongjop ha ki jingiakop bapher bapher
U bah Hamlet Dohling, haba kren haka jingïalang ha Iongpiah ula ong ba jingwanrah ïa ka Citizenship Amendment 1955 Bill ha Lok Sabha kala wanrah ka jingsyier ïa kane ka jaidbynriew rit paid. “Ngi long ka jaitbynriew kaba tang shi troh bad lada mynjur ïa kane ka Bill ngin kylla long ki rit paid ha la ka jong ka ri bad kane kan ktah iaki pateng kiba hadien”, la ong u Dohling bad bynrap ba lada urlong sa kane ka Amendment Bill Citizenship 2016 nangne shakhmat sa Shiphew snem phin ïohi da ki phew lak ngut ki mynder ri kiba dei na ki rit paid kynthup na Afghanistan, Bangladesh bad Pakistan kin wan buhai shnong bad kin ïoh iaka hok ban long ki nongshong shnong ka Ri India.
U Bah Dohling ula khot la wer ïa ki nongshong shong ban kyndit naba ïoh thiah bad ban ieng pyrshah ïa kane ka aiñ. U Myntri Pynroi Sor ula kular ban shimkhia ban pynïoh ïaka Kiang Nangbah Eco Friendly Mini Park.
Ka AJYWO Central Body ha ryngkat ka AJYWO East Jaintia Zone hapoh ka jingïalam u Ma M H Dkhar President bad u Bah Heatermoon Ryngkhlem, President kum ba ju leh man la ka snem kala kynmaw burom ïaka lyngkhuh snem sngi iap U Kiang Nangbah, u Khlawait Ri Jaiñtia.
KA AJYWO kala leit buh syntiew ha u mot u Kiang Nangbah ha Khliehriat, East Jaintia Hills District
La ïadonlang u Bah Adelbert Nongrum, MLA jong ka North Shillong Constituency bad ki nongbud jong u lem bad ki dkhot jong ka AJYWO.