Press "Enter" to skip to content

Jam ka shnong Umiew Maw-u-Sam ïa ki mawmer 25 snem

Shillong, Nohprah, 30: Ka shnong Umiew Maw-u-Sam hynnin ka sngi saitjaiñ ka la rakhe ïa ka Jubili Rupa ne ka Lyngkhuh 25 snem naduh ba la pynkha ïa kane ka shnong ha u snem 1992-1993 da kaba phiah na ka shnong Umphrup bad kaba hap hapoh u pud u sam jong ka Hima Khyrim.
Shwa ban plie ïa ka jingrakhe ïa kane ka Jubili, ki paidbah nongshong shnong ki la sakhi ïa ka jingplie ïa ki 12 tylli ki Solar Street Light ba la bei jingïarap da ka tnat Assam Rifles lyngba ka Civic Action Programme. Ïa kane ka projek ba la pynlut haduh T. 11 lak la plie paidbah da u Colonel J P Sattigiri, u Commandant ka Directorate General, Assam Rifles ha ka kyrteng jong u Director General ka tnat Assam Rifles.
Hadien kane, ka shnong ka la rakhe ïa ka Jubili Rupa ha kaba u Pa’iem Dr. Balajied Sing Syiem, u Syiem ka Hima Khyrim u la long u Kongsan ha ryngkat ka jingïadonlang u Sordar Shnong, u Bah Berington Kharmujai, u Secretary Shnong Bah Dengbok Kurkalang, u Bah Thno Nongspung u Sordar banyngkong eh ka shnong Umiew Maw-u-Sam, u Bah Khlaiñni Lyngdoh Nongbri, u Lyngdoh jong ka Raid Nongbri bad ki paidbah nong shong shnong.
U Pa’iem Balajied haba kren kum u Kongsan ha kane ka sngi, u la pynkynmaw biang ïa ki sngi ba la leit noh mynba la phiah ïa ka shnong Maw-u-Sam kum ka shnong bapura na ka jingpeit jingkhmih jong ka Shnong Umphrup khlem kano kano ka jingïakynad hynrei lyngba ka jingïasngewthuh jingmut.
U la ong ruh ba ka jingpynkha thymmai ïa ki shnong kan nang wanrah shuh shuh ïa ka jingkiew irat ki shnong ki thaw lyngba ka jingtrei shitom jong ki Dorbar Shnong ban wanrah ïa ki kam pynroi na ka bynta ka bit ka biang bad na ka bynta ka jingmyntoi jong u paidbah.
Haba pynpaw ïa ka jingsngewkhia halor ka jingkynrei jong u drok ha kane ka juk, u Pa’iem Balajied u la ong, “haba jaipdeh ka jingmut jingpyrkhat, ki samla ki ngop noh ha ki jingmlien kiba sniew bad wat ha u drok. Nga pynkynnmaw ïa ki kmie ki kpa ba ki dei ban kynmaw ban sneng ban kraw ïa la ki khun ki kti khnang ba ka jabieng bad ka jingmut jingpyrkhat jong ki kan long kaba khuid.”
Ka shnong Umiew Maw-u-Sam kaba hap hapoh ka Raid Nongbri ka don mar syndah jong ka shnong Smit ïa kaba la ker tawiar da ka Wah Umiew kaba ki paidbah ka sor Shillong ki ju pyndonkam ïa ka um lyngba ka Greater Shillong Water Supply Scheme. Kane ka shnong ka don 690 spah ngut ki nongshong shnong kat haduh ka jinglum Khanasamari da ka shnong ha u snem 2015 ha kaba ki paidbah ki dei kiba ju im da ka rep ka riang bad kiwei kiwei ki jait kam.
U Bah Dengbok Kurkalang haba pule ïa ka histori jong ka shnong u la ïathuh ba dei ki kur Warlarpih bad ki Kur Mukhim kiba la buhai shnong nyngkong eh ha Umiew Maw-u-Sam bad la bud pat sa ka Kur Mukhim bad kiwei kiwei ki kur pat hadien habud.
“La pynshong nongrim ïa ka jingïaid lynti jong ka shnong sha ki 25 tylli ki mawmer lyngba ka jingai Sanad ïa u Sordar Shnong banyngkong eh ka Umiew Maw-u-Sam ha u snem 1993,” ong u Bah Dengbok uba long ruh u Secretary jong ka shnong bad bynrap, “ki Sordar shnong kiba la synshar ïa ka shnong naduh ba sdang ki long u Bah Thno Nongspung, u Bah Ïaraplem Kharmujai, u Bah Elet Kharbihkhiew (bam kwai ha dwar u Blei), u Bah Jiedstar Nongspung bad u Bah Berington Kharmujai uba dang ïai bteng haduh mynne mynta kum u Sordar Shnong.”
Kane ka shnong ka don ruh ïa ka skul mishon ba la pynïaid da ka Balang Presbyterian Smit tang haduh Class-V bad lyngba ka Village & Water Sanitation Committee, kiba bun ki longiing hapoh kane ka shnong ki la don la ka paiñkhana.
Ka Shnong Umiew Maw-u-Sam ka long kaba donbok haduh katta katta namar hapoh ka jingïalam jong u Sordar Shnong bamynta, u Bah Berington Kharmujai, la lah pyntrei ïa ka surok na ka skhim PMGSY ban pynsuk ïa ki paidbah nongleit nongwan. Ha kane ka sngi, la pynshongkun ïa ka jingrakhe ïa ka Jubili Rupa da ka jingrwai bashoh mynsiem na ka kynhun Sienmang bad ka jingpynïalehkai phutbol hapdeng ki samla pyrshah ïa ki rangbah jong ka shnong.