Press "Enter" to skip to content

Kyrmen ka UDP ban khur jingjop ha ka Elekshon MDC bad MP-Lok Sabha-2019

Pynïasoh ki Nongïalam NPP, INC, PDF bad KHNAM
Shillong. Nohprah 30: Ka United Democratic Party (UDP) kala pynpaw ïa ka jingsngewskhem ba ka khur bun ka jingjop ha ka elekshon MDC-2019 sha ka Ïingdorbar Khasi Hills Autonomous District Council (KHADC) bad ruh ka Elekshon MP-Lok Sabha na Shillong Constituency.
Kane ka jingsngew skhem jong ka UDP kala wan jia da ka jingwan pynïasoh jong ki Nongïalam na ki seng saiñ pyrthei bapher bapher sha ka Party ba kynthup naduh ki Nongïalam ka National Peoples Party (NPP), Peoples Democratic Front (PDF), Khun Hynniewtrep National Awakening Movement (KHNAM) bad na ka Indian National Congress (INC).
Kane ka jingwan pynïasoh jong ki Nongïalam na ki seng saiñ pyrthei bapher bapher kala jia ha Ri-Bhoi District bad la pdiang burom ïa kine ki Nongïalam ha ka jingïalang bala pynlong da ka UDP myn ha ka 28 tarik Nohprah ha Umroi. Ïa kine ki Nongïalam seng saiñ pyrthei la pynrung dkhot kum ka jingpynkhlaiñ ïa ka Party ha ka elekshon MDC bad MP-Lok Sabha-2019.
Ïa kane ka jingïalang la pynïaid da u Bah Paul Muktieh kum u Convenor bad ki Nongïalam ka UDP bala iadonlang ki kytnhup ïa u Bah Bindo M Lanong Senior Working President, Dr Jemino Mawthoh, General Secretary uba dei ruh u Kyrtong ïakhun MP-Lok Sabha, u Bah Donbok Khymdeit President ka UDP-Ri-Bhoi, Bah Reyonald Kharkamni General Secretary ka UDP-Ribhoi bad kiwei kiwei ki Nongïalam ka UDP na Umsning Constituency.
Kine ki Nongïalam saiñ pyrthei ba wan pynïasoh sha ka UDP ki dei u Bah F.D.Ramsiej Working President ka NPP-Ri-Bhoi District, Bah Sunlight Shadap Working President ka PDF-Umroi Circle, Kong Cristabell Wanniang na ka KHNAM, Pynhun Mawroh na ka Congress, H Mawlong President NPP Bhoirymbong bad Asher Makri President ka NPP Umroi Area.
Ha kane ka sngi, ki Nongïalam jong ka UDP kiba la phetseng kum u Bah Siral Marbaniang, B Shadap bad kiwei kiwei, kila wan phai biang sha ka UDP bad la pynrung dkhot ïa ki hapoh ka UDP-Umroi Circle.