Press "Enter" to skip to content

Pynkup burom ka Kynton Massar ïa ka Longïing ba long ‘Nong Samaria ba Bha’

Shillong, Nohprah 30: Ka Dorbar Shnong Mawlai Kynton Massar kala pynkup burom ïa ka Longïing jong ki ñia kha bad ka ïing ka sem u Bah Marbud Dkhar, kyrtong ban ïakhun MDC-2019 na Mawlai Constituency namar ka jingdon ïa ka mynsiem ‘Nong Samaria ba Bha’ ïa ka Shnong ka Thaw bad ïa ka Mawlai Pyllun baroh kawei.
Ka Shnong Kynton Massar kala pynkup burom ïa kine ki Longïing ha ka sngi pynhap pyrda ïa ka jingrakhe ‘Kynton Massar Day’ halor ka jingdap 66 snem ka Shnong, kaba long myn ha ka janmiet sngi saitjaiñ ha shnong Kynton Massar. Kine ki Longïing ki dei jong i Kong Baphindalin Giri Massar bad Bah David Massar kiba dei i Kmienah bad u Kpa jong u Bah Marbud Dkhar.
Lah ban kdew hangne ba ka Mawlai Water Works ba tan umbam umdih ka Tnad PHE ban sam sha ki Shnong ka Mawlai Pyllun ba la tip kum ka Umsohlang, ka dei ka jaka kaba la ai sngewbha da ka Longïing i Kong Baphindalin bad Bah David Massar bad ka surok kaba ïaid na Sohmatan ban mih sha Umsohlang ruh ka dei kaba la ai da kane ka longïing ha kaba ka Shnong Kynton Massar kala ïoh syndon ban shna ïa ka surok ïaid kali.
Nalor kane, ka jaka ba pynïakhlad ïa ka Wah jong ka Umshing Umsohlang bad ka nala ba wan tuid ka Umjaboh na Umshyngiar ruh ka dei ka jaka kaba la ai sngewbha da kane hi ka longïing jong ki ñia kha u Bah Marbud, kaba la pynlong ïa ki Nongshongshnong ka Mawlai ba kin ïoh ïa ka umbam umdih kaba khuid bad ba shngaiñ.
Shuh shuh, dang ha ki khyndiat bnai bala lah, kane kajuh ka Longïing kala ai pyndonkam sngewbha ruh ïa ka jaka kaba heh bha sha ka shnong Kynton Massar ba kan pynlong madan ialehkai phutbol na ka bynta ki Khynnah bad ki Samla. Nalor kata, U Bah Marbud ula synniang nalade da ka kali JCB ban pynlur ïa kane ka madan na ka bynta ka Shnong. Ki dei halor kine ki nongrim ba ka Dorbar Shnong Kynton Massar kala pynbna ban ai ka jingkyrshan ba pura ïa u Bah Marbud ha ka elekshon MDC ban wan bad kala kitbok kitrwiang ruh ïa une u samla rangbah ba un ïoh ïa ka jingjop bad ba un long u nong ïasaid na ka bynta ka Ri bad ka Jaidbynriew hapoh Khasi Hills Autonomous District Council (KHADC).
Ïa kane ka jingrakhe ‘Kynton Massar Day’ la pynhap pyrda da u Bah David Massar kum u Kongsan bad u Bah Marbud kum u Symbud Kongsan ha ka jingiadon ryngkat i Kong Baphindalin Giri Massar lem bad ki Khun ki Kti.
Haba ai jingkren, u Bah Marbud ula ai khublei ïa ka Dorbar Shnong bad ïa ka Shnong halor ka jingdap 66 snem bad ula kitbok kitrwiang ba ka Shnong kan nang kiew irat bad nang roi nang par ha ki sngi bad ki snem ban dang wan.
“Ki Dorbar Shnong ki dei ki paia jong ka synshar khadar ka Ri-Khasi. Donkam ban pynkhlaiñ bha ïa ki bad ngi dei ban ieng tylli kawei ban pyrshah ïa ki bor kiba thmu ban sloit ïa ki iktiar jong ki Khlieh Nongsynshar naduh ki Dorbar Shnong, ki Raid, ki Hima bad ter ter” ong u Bah Marbud haba bynrap “Dei halor kane ka nongrim ba ula rai ban mih aireng ha ka elekshon MDC ban wan khnang ban pynïoh biang ïa ka bor ka iktiar bala duh”.
U Bah Marbud ula kyrpad ïa ki nongshongshnong ka Kynton Massar bad ka Mawlai Pyllun ba kin ai lem ïa ka jingkyrshan ïa u ha ka jingialeh jong u haba kular ruh ban ai ka jingshakri kaba hok bad kaba janai sha ki paidbah ryngkat ka jingiatreilang bad u MLA. Ïa kane ka jingïalang la pynïaid da i Dr Sukjai iba dei i President ka Seng Longkmie bad la pyniphuh iphieng ïa kane ka sngi da ki jingrwai, jingshad na ki Khun samla ka Shnong.