Press "Enter" to skip to content

Pynkup burom u Syiem ïa ka HANM-WW ba pynïoh surok na ka jingshah thngan

Nongpoh, Nohprah 30: U Syiem ka Raid Marwet ryngkat ki Longsan ki Mansan ha ka sngi Saitjain ki la pynkup burom ïa ki nongïalam ka Hynniewtrep Achik National Movement (HANM), Women Wing, (W.W)Central Body kum ka jingburom halor ka jingshah thngan kaba ki la ïa khun haduh ba ki la lah ban pynïoh ïa ka surok rong sha ki Shnong khappud ba hap ha ka Raid Marwet ha Ri Bhoi.
Kum ban pynkynmaw, ki nongïalam ka HANM, WW ha u snem 2015 ki la mih pyrthei haduh u pud ba kin shong shah thngan ha Nongpoh na ka bynta ban dawa na ka sorkar ban siang rong noh ïa ka surok na 13mer sha Killing kaba don haduh 5 km ka jingjngai ban pynïasoh sha kiba bun ki Shnong khappud ha ka thaiñ Umtyrnga ha Ri Bhoi bad ka jingshah thngan kitei ki nongïalam ka HANM, WW ka la seisoh ha kaba mynta ki paidbah ki la ïoh syndon da ka surok rong bap aka ba la pynsuk ïa ki ha ka leit ka wan bad la lait ruh na ka jingpynthud ki Pulit Assam kaba kim donkam shuh ban pyndonkam ïa ka surok na Assam.
Kane ka jingpynkup burom la pynlong ha ka sngi Saitjain ha Madan Jorbil, Killing ha kaba u Paiem ka Raid Marwet, u paiem Ken Syiem ryngkat ki Longsan ki mansan ki la pynkup burom ïa ki nongïalam ka HANM, WW ha ka jingïalam ka Kong Beti Jyrwa kum ka President bad ka Kong B. Sungoh kum ka General Secretary ryngkat kiwei kiwei ki nongïalam kiba la don bynta ha ka jingshah thngan ban pynïoh surok ïa ki Shnong ba hap ha khappud ka Meghalaya bad Assam ba hap ha ka Raid Marwet ha Ri Bhoi District.
La pynkup burom ruh ryngkat ki syntiew ki skut bad ki jaiñ kordor ba la pynkhreh da ka ophis u Syiem ka Raid Marwet kaba long ka jingburom bad sngewnguh halor ka jingshim khia ban ïa khun na ka bynta ban pynïoh surok ïa ki khun ki hajar jong u ba hap ha ki Shnong Khappud ka Meghalaya.
Haba kren ha katei ka sngi, u Paiem Ken Syiem u la pynpaw ka jingsngewkmen bad ka jingsngewnguh kaba khraw ïa ki nongïalam ka HANM, WW kiba la kloi ban shim ïa ka jingkitkhlieh na ka bynta ban pynsting ïa ka jingeh ki paidbah khappud kaba ki la ju kynduh mawsiang na ka por sha ka por na ka daw ka jingbym don ka surok kaba bit ba biang bad ba paka.
U la ong ruh ba kane ka jingïoh ki paidbah ïa ka surok rong na 13mer sha Killing ka la long ka jingkyrkhu kaba khraw ha ka leit ka wan, namar ki paidbah kim donkam shuh ban pyndonkam ïa ka surok ka Assam kumba ki la ju kynduh jingeh baroh shi katta na ka jingpynthud ki Pulit ka Assam.
“Kum u Syiem bad ka Raid hi baroh kawei ka ai ka jingsngewnguh kaba khraw ïa ki nongïalam ka HANM, WW bad u kyntu ruh ïa ki Nongïalam ba kin dang bteng ïa kane ka kam ba bha sha kiwei ruh ki Shnong kiba donkam ïa ki jingïarap na ka bynta ka roi ka par bad ka jingkiew shaphrang ha baroh ki liang” u la ong.
Na ka liang ka nongïalam ba rangbah ka HANM, WW, ka Kong Beti Jyrwa ruh kum ka nongïalam ka la pynpaw ïa ka jingsngewkmen ba u Syiem ryngkat ki longsan ki mansan ki la ai ïa kane ka burom sha ki Nongïalam ka seng bad kane ka ai mynsiem ruh ïa ka seng ba kan dang lah ban leh kiwei kiwei ki kam na ka bynta ka bha ka miat bad ka roi ka par jong ka imlang ka sahlang.