Press "Enter" to skip to content

Sumar jingpang khmat ki BSF ïa 210 ngut ki paid Khappud, 105 ba ïoh iitkhmat

Shillong, Nohprah 30: Katba ka pyrthei ba dang rakhe ïa ka Khristmas bad ap ïa u snem thymmai, ka kynhun ki Doktor jong ka BSF Composite Hospital, Shillong, kila pynlong ïa ka jingai jingsumar khmat ei ïa ki paid khappud ka Jylla bad ka Bangladesh.
Haduh 210 ngut ki paid nongshongshnong ka khappud, kila ïoh ïa ka jingsumar khmat ei na ki shipai BSF kaba la sdang naduh u bnai Naiwieng bad hynnin ka sngi saitjaiñ, la sam pat ïa ki Iitkhmat sha ki 105 ngut ki briew ba donkam deng iitkhmat bad 3 ngut pat la puid ïa ki khmat (cataract operation).
Ki shipai BSF kila pynlong ïa kane ka prokram ai jingsumar khmat ei kat kum ka National Blindness Control Programme jong ka Sorkar Pdeng bad la pynlong ïa ka da ka Hospital ki BSF, Shillong hapoh ka jingïalam jong u Medical Superintendent Dr AC Bhardwajan.
Napdeng kine ki briew la ïathuh ba 87 ngut ki briew ba na Dawki bad Umsyiem
la ïoh ban khmih bniah ïa ka jingpang Skhor, Khmut bad Ryndang (ENT), Hepatitis B &C bad Diabetes. La ïathuh ba ïa ki briew ba shem ba don jingpang ENT, yn leh surgery ei hapoh BSF Composite Hospital, Shillong bad ïa kiba don jingpang shini (diabetes) pat la ai dawai bad yn sa ïai khmih bad ïai sumar da ki doktor ka Hospital.
Ïa kane ka Medica Camp la plie da u Dr AC Bhardwajan, DIG, Medical Superintendent ki BSF bad u SR Khan Commandant ka 30 Bn BSF. Kine ki Heh shipai kila kular ruh ïa ki paid khappud ba kin dang ïai bteng ban pynlong ïa kum kine ki prokram ha ki sngi ban dang wan.
Ha une u snem 2018, ki shipai BSF kila pynlong haduh 11 tylli ki Medical Camp na ka bynta ki paid nongshongshnong jong ki jaka khappud ka Jylla.