Press "Enter" to skip to content

Yn ïakhun MDC u Bah Jimmy Raul Kharmuti

Shillong, K’lyngkot, 02: Ka Durbar Pyllun jong ka shnong Nongkhroh kaba la long ha ka 27 tarik u bnai baladep ka la mynjur ban pynieng ïa u samla Jimmy Raul Kharmuti, kyrtong ban aireng ha ka elekshon MDC sha ka Iingdorbar Thawaiñ ka Jaiñtia Hills Autonomous District Council (JHADC) na ka Ummulong- Moodymmai Constituency.
Ka Durbar Pyllun ka la shim ïa kane ka rai hadien ba ka la pdiang ïa ka jinglong nongshong shnong bapura jong u Samla Jimmy Raul Kharmuti hadien ba u Waheh Shnong ka shnong Nongkhroh u la pule ïa ka shithi ba tyrwa rung shnong na u Samla Jimmy Raul ha kaba ka Durbar ka la pdiang ïa ka jingtyrwa jong u.
U Samla Jimmy, u la pynpaw ïa ka jingsngewnguh ïa baroh ki nongshong shnong jong ka Nongkhroh khamtam ïa ka Durbar Shnong ba ki la pdiang ïa u kum u khun ka shnong, khamtam ba ki la pdiang bad la rai ban pynieng ïa u kum u kyrrtong MDC na ka Shnong Nongkhroh.
Kiba bun na ki longkmie ki longkpa bad ki samla ki la pyrta ba ki kyrshan tylli ïa u kum u kyrtong jong ka Shnong.
U Samla Jimmy Raul Kharmuti haba kren ha kane ka sngi, u la pynpaw ba ka thong ba hakhmat eh jong u lada u poi sha ka thong kum u MDC un wanrah ka polisi kaba kyrpang na ka bynta ban ïada bad kyntiew ïa ki nongrep bad ki shnong nyngkyndong, un wanrah ruh ka polisi bakyrpang ban kyrshan bad ai ka lawei jong ki khun samla kumjuh ruh un wanrah ka polisi kyrpang ban kyntiew ïa ki jaka jngohkai pyrthei khnang ba ki khun samla kin ïohkam ïohjam bad ban kyntiew ruh ïa ka ïoh ka kot ka Constituency baroh kawei.
Ka Dorbar Shnong ka la buh ruh ïa ki kyndon aiñ na ka bynta ka elekshon MDC da kaba shah ban rah tang lai tylli ki kali bad 10 ngut ki nongbud ïa u ne ka Kyrtong ha ka por ïalap Elekshon. Yn ym shah ïa kino kino ki briew ba nabar shnong ban rung ing palat ka 9:00 baje mynmiet, la khang pyrshah ban kit kyiad ne pisa ha ka por elekshon, la rai ruh ba ym bit ïa u ne ka dkhot shnong ban sakhi lamler ïa ka rai ka Durbar Shnong sha kiwei pat ki jaka bad la kyrpad ïa baroh ban ïatreilang bad ka rai ka Dorbar Shnong ban wanrah ïa ka bha ka miat hapoh shnong poh thaw.
Ïa kino kiba pyrshah yn pynshitom katkum ki kyndon aiñ, ong u kyrwoh ba la pyllait paidbah da u Waheh Shnong Ma Elvin Mynsong bad Secretary Shnong Ma Kyrmen Rynjah.