Press "Enter" to skip to content

Buddien ka STIEH ïa ka Lineage Bill ka KHADC

Shillong, K’lyngkot, 10: Ka Saiñdur Tipkur-Tipkha Ieng Ehrngiew Hynñiewtrep (STIEH) mynta ka sngi palei ka la ïakynduh ïa u Myntri ka tnat District Council Affairs, u James PK Sangma ban buddien ïa ka Khasi Hills Autonomous District (Khasi Social Custom of Lineage) (First Amendment), Bill, 2018 ba la mynjur da ka Khasi Hills Autonomous District Council (KHADC).
Ka KHADC ka la mynjur ïa kane ka Bill ha ka 27 tarik u bnai Risaw, 2018, hadien ka jingkhot pynlong ïa ka Dorbar Bakyrpang.
Ki nongïalam ka STIEH hynne ka sngi ki la aiti ruh da ka jingthoh ha u Myntri ka tnat District Council Affairs ban ai noh ïa ka jingmynjur khnang ban ïoh phah noh kham kloi sha u Lat ka Jylla ba un shon muhor ban pynlong aiñ noh ïa kane ka Bill.
Haba ïakren bad ka President ka STIEH, ka Kong Deiwi Tongper, ka la ïathuh ba u Myntri ka tnat DCA ula pynpaw ba u ïathuh ba kane ka Bill mynta ka dang don hapoh ka jingbishar bniah jong ka Law Department ka Sorkar Jylla.
“Na ka liang u Myntri ka tnat DCA ula pyntip ba kan dang shim por sa katto katne bnai ba ka Law Department kan pyndep ïa ka jingbishar kaba bniah khnang ba ki kyndon aiñ kiba la bsut hapoh kane ka Bill kin ym don kano kano ka jingïatakhuh bad ka Riti Synshar jong ka ri India,” la ïathuh ka Kong Deiwi.
Ka la ïathuh ruh ba ka STIEH ka la banjur bha ïa u Myntri ka tnat DCA ba un kham pynkloi ban ai noh ka mynjur ïa kane ka Bill da kaba kdew nuksa ïa ka jingma kaba ap haduh tyngkong ïa ka jaidbynriew ritpaid Khasi nalor ba ka Iingdorbar Thawaiñ Lok Sabha ka ladep mynjur ïa ka Citizenship Amendment Bill.
“Ka Lineage Bill ka dei kaba aiñ ba donkam bha ban ai jingïada ïa ngi kum ka jaitbynriew ritpaid,” la ong ka Kong Deiwi.
Kum ban shu pynkynmaw, ka STIEH dang shen ka la leit ïakynduh ïa u Lat ka Jylla Meghalaya u Tathagata Roy ban buddien ïa ka Lineage Bill.
Hadien ka jingïakynduh ïa ki nongïalam ka STIEH, u Lat u la phah da ka jingthoh sha ka Sorkar Jylla bad pynpaw ruh ba u la ïoh ïa ka shithi jingkyrpad na ka STIEH ban pynstet ïa ka jingmynjur ïa kane ka Bill.