Press "Enter" to skip to content

Byrngem ka KHADC ban khang tala ïa ki dukan Bar Jylla ba khlem Licence

Ka Khasi Hills Autonomous District Council (KHADC) kala byrngem ban khang tala ïa baroh ki dukan jong ki Nongkhaii Bar Jylla hapoh u pud u sam ka Council kiba iadie ïathied khlem ka Trading Licence.
Mar ïashimti ban khmih biang ïaka Tnad Trade, u Executive Member Bah Latiplang Kharkongor haba ïakren bad ki lad pathai khubor hynne ka sngi palei, ula pyntip ba un sa lum ïa ka jingïalang bad ki Ophisar jong ka Tnad Enforcement ha ka taiew ban wan ban ïakren halor ka jingkhynra Trading Licence hapoh u pud u sam ka Council.
U Bah Latiplang u ong ba ka long kaba donkam ban pynkhlaiñ ïa ka jingkhynra Trading Licence namar ka Council kala ïoh pdiang ïa ki jingujor ba bun ki Nongkhaii Bar Jylla kila pynkheiñ ïa ka KHAD (Trading by Non-Tribals Regulation) Act ha kylleng ki jaka.
“Nga maham ïa ki dukan bar Jylla kiba treikam khlem ka Licence na ka Council ba kin sa shang khang tala noh” ong u EM haba pyntip ba ka jingkhynra Licence kan long ruh wat ïa ki bar Jylla kiba shong dukan madan hangne ha Nongbah Shillong.
Une u MDC ka Nongthymmai ula ong ka Council ka lah ruh ban shim ïa ka sienjam ha ka ban kniehnoh ïa ki Trading Licence jong ki Nongkhaii Bar Jylla lada shem ba kim shym la pynthymmai ïa ki licence palat ïa ka san snem bad kine ki Nongkhaii kin hap ban applai biang da kaba thymmai.
U Bah Latiplang u pyntip ruh ba u don jingthmu ban khyllie biang ïa ka Notification bala pynduh pyndam noh da ka Executive Committee kaba rim, kaba ong ba ka jingai No Objection Certificate (NOC) jong ki Shnong kan nym shong tang ha ka rai ba marwei jong u Rangbah Shnong.
“Ngan sa khyllie biang ïa kane ka Notification bad ban pynthikna ba ka jingai NOC ka dei ban wan na baroh ki Dkhot jong ka Executive Dorbar jong ki Shnong ki Thaw” ula ong.
Une u Executive Member ula pyntip ruh ba ka tnad Trade kan sa pynlong ïa ka survey ba thymmai ban tehlakam ïa ka jingai Trading Licence ha ki jaka ba la bun tang da ki Nongkhaii Bar Jylla khnang ba ki samla ka Jaidbynriew ba khlem kam khlem jam kin ïoh ïaka lad ban ieng lang hala ki jong ki kjat.
Kat kum ka jingong jong u, ka Council kan sa iatreilang ruh bad ka Ophis u Syiem ka Hima Mylliem na ka bynta ban tehlakam ïa ka kam khaii be-aiñ jong ki Nongkhaii Bar Jylla ha Iewduh, kaba dei ka pliang ja jong ka Jaidbynriew.
Haba kylli, u Bah Latiplang ula pyntip ba un pyrshang kat kaba lah ban pynjanai ïa ka rukom treikam jong ka Tnad watla ka por kala lyngkot namar ka jingwan jong ka elekshon MDC.
U Bah Latiplang ula shah pynkhamti ruh ban khmih ïa ka Tnad Elaka da u CEM Bah HS Shylla, uba la bujli kam ha ki khyndiat sngi bala leit noh.