Press "Enter" to skip to content

Durut tyngeh ki rang ïalehkai ka Lajong ban jop ha la ïing ïa ka Indian Arrows

Shillong, K’Lyngkot 10: Ka kynhun ïalehkai ka Shillong Lajong FC ki la durut bad minot bha ha ka liang ban ïa kilan tyngeh, kum shi bynta ka jingpynkhreh ka jong ki ban lah ban jop ïa ka kynhun ïalehkai ka Indian Arrows, naka bynta ka jingïakhun ban long ha la ïing.
Kane ka jingïakhun hapdeng kine ki ar kyhun naka bynta ka lympung ïalehkai jong ka I. League kan long ha ka 13 tarik, kata ha kane ka sngi U Blei jong ka taiew.
Ka jingïakhun kan long ha ka por 2 baje nohphai sngi ha JN Stadium. Polo.
Ka khana na kane ka jingïakhun hapdeng kine ki ar kynhun ka long ba baroh ar kin mih madan ban ïakhun khlem ka jingdon satia ki rang ïalehkai bar ri, hynrei ki ar kynhun kin mih madan da ki samla ïalehkai ba dang shu sdang ban khie ban san na ka thaiñ bad ha ka ri.
Haba phai sha ka kynhun ïalehkai ka Indian Arrows, kan rung sha kane ka jingïakhun hadien ba ka la dep ba kan shah liem (1-2) hakhmat ka East Bengal ha ka jingïakhun ba la long ha nongbah Bhubaneshwar, Odisha, katba na ka liang ka SLFC ka la dep ba kan mad ïa ka nam rem kaba long da 3-2 hakhmat ka NEROCA FC, ha ka jingïakhun ba la dep ban long ha nongbah Imphal, Manipur.
Kane kan dei artad ka jingïakhun ba nyngkong ha la ïing hadien ka jingwan jong u snem ba thymmai ïa ka SLFC.
“Kan dei kawei na ki jingïalehkai kaba kongsan tam ïa ngi kum ka kynhun, dei halor kane ka nongrim, ba mynta ngi la dem minot ban pynbeit lut ïa baroh ki jingeh bad ki jingduna kiba ngi mad kum ka kynhun, kum shi bynta ba ngin lah ha kaban pynwandur noh ïa ka rukom ïalehkai kaba janai bad ban lah ruh ban khur ïa ka jingjop” la pynpaw u Alison Kharsyntiew, coach ka SLFC ha u kyrwoh ba la pyllait ïa ka da ka klob mynta ka sngi.
“Ka kylla ïalehkai kaba ar jong ka lympung ka la sdang bad ka por ka la dei ïa ki khynnah ba kin donkam ban shut pynnep bha ïa la ki reng, namar man la ka jingïakhun kaban wan ki long kiba kyrpang bad nga kyrmen ba kane ka jingthmu ka jong nga ka la rung ha ki” la bynrap shuh shuh u Alison.
U Alison u pynpaw ruh ba ka por ka la dei ïa ki khynnah ki jong u ban mih madan khlem da don shuh ka mynsiem ba shieptieng, hynrei kin hap ban long kiba shlur bad ba kidei ruh ban pyrshang katba lah ban ïa tynjuh bor bad man la ki kynhun ba kin hap ban ïalehkai nangne shakhmat.
Naka liang u Alison, u kyrmen ba ki paidbah ruh kin wan lem ban ïarap naka bynta ban ai mynsiem bad kyrshan bor bah na sha lyndet da kaba u la kular ba ha kane ka kynti ïakhun kaba mynta, ma u bad ka kynhun ki long kiba la pynkhreh ban mih madan da kawei pat ka dur bad ka sur ïalehkai.
Ïa ki tiket naka bynta kane ka jingïakhun lah ban ïoh na ki jaka die tiket jong ka SSA, Polo ha ka sngi ba long kane ka jingïakhun.