Press "Enter" to skip to content

Kaei ka Citizenship (Amendment) Bill, 2016 bad balei la mih ki jingïakhih ki paidbah?

Bah Philip Marweiñ

Ka Citizenship (Amendment) Bill, 2016 ka dei ka Bill lane ka aiñ ba la thaw da ka sorkar National Democratic Alliance (NDA) hapoh ka jingïalam jong u Prime Minister, Narendra Modi, kaba thmu ban wanrah jingkylla ïa ka aiñ kaba la don lypa kaba kyrteng ka Citizenship Act, 1955. Te ka jingthmu jong kane ka aiñ Citizenship (Amendment) Act, 2016 ka long ban pynlong Nong-India noh ïa ki kynhun jaitbynriew Hindu, Sikh, Buddhist, Jain, Parsis bad ki khristan kiba la wan phetrieh bad buhai shnong artat ha India na Bangladesh, Pakistan bad Afghanistan. La ngeit ba kane ka jingwan buhai shnong jing kine ki jaitbynriew ha India na kitei ki lai tylli ki Ri, ka dei halor ka nongrim ba kine ki jaitbynriew ki shah lehbeiñ ha kiwei pat ki jaitbynriew lane na ka sorkar ha kitei ki Ri. Bad, kane ka jingpynlong Nong-India ïa kitei ki jaitbynriew-Hindu, Sikh, Buddhist, Jain, Parsis bad ki Khristan ka long ba lada ki la shong ha India shuwa ka 31.12.2014 bad lada ki la shong sa sah ha India tang 6 snem ruh ka la biang ïa ki ban long Nong-India, ym donkam ban da don kita ki dulir phulir ban pynshong nongrim ïa ka jingwan jong ki na kitei ki Ri hynrei, lada ki don ruh ka biang hi. Ha kaba ïadei bad kane, ka aiñ mynshuwa ka ong ba kine ki jaitbynriew ki dei ban shong ban sah ha India la kumno kumno 12 snem shaneng ka la biang ïa ki ban dup ïoh long Nong-India.
Mynta pat balei ka la mih ïa ka jingïakhih paidbah ym tang naduh ka 8 tarik mynta u bnai Kyllalyngkot, 2019 bad ter ter lehse, hynrei ka la don ka jingïakhih kaba naduh ka snem 2016, 2017 bad wat ha ka snem 2018 ruh, halor kane ka Bill ?. Ka daw tynrai ka dei ba kine ki jaitbynriew ki dei ki mynder Ri bad ba ki la bun lakh bad klur ruh ha India, khamtam ha kane ka thain shatei lam mihngi jong ngi naduh Sikkim, Arunachal Pradesh, Assam, Nagaland, Manipur, Tripura, Nagaland, Mizoram bad Meghalaya. Lada shah ban pynlong traishnong Nong-India ïa kine kiba la bun katne katne mangi ki trai shnong trai muluk ngin shu jah rngai kumba long shi shamoit ha duriaw bah. Ngin shu jah rngai beit khlem ïohi dak shuh, nalor ba la wan tyllep lypa da ki bun klur ki khar muslim na Bangladesh, Pakistan, Burma bad nawei nawei. Kumno keiñ shu pynlong trai shnong kha-ma-kha da kane ka Bill ïa ki mynder Ri? Ki mynder ki dei beit ki mynder bad ym lah ban pynlong traishnong ïa ki. Donkam ban thwet ïa ki bad dei ban phah noh ïa ki sha ki Ri ba ki la mih. Lada mangi ngi leit sha Bangladesh ne Pakistan ne sha kiwei pat ki Ri kito ki Ri kin ym shah ïa ngi bad kin ym ai jaka puta sah ïa ngi. Kumno ma ngi pat hangne ha India ngi thaw da ki aiñ kyrpang ban pdiang lut ïa ki jaitbynriew baroh kiba wanwir wanhap bad buhai shnong hangne? Ki la don lypa da ki spah klur ki Mynder Ri ha Ri India kiba la wan buhai shnong hahgne, khamtam lei lei lada kheiñlang ïa ki Muslim bad ki Hindu kiba wanpoi na Bangladesh, Pakinstan, Afghanistan, Burma, Nepal bad na kiwei de ki Ri !. Ka Ri India ka la don mynta kumba 1.35 billian ki khlieh briew bad na kine tang ki mynder Ri ne ki poiwir buhai shnong ha kane ka Ri ym jin shuh ïa ka 100 millian ngut. Tang ha kane ka thaiñ North East ruh la jyllei lypa. Kumta kane ka Bill ka thmu ban nang pynjynjar shuh shuh ïa ka Ri khamtam ïa kane ka thain shatei lam mihngi. Baroh ngi ïasngewthuh lut kumno kan jia bad kan ktah ïa ka Ri kaba la bun briew than bad khamtam lei lei lada jia ba ka Ri ka kdup ïa ki poi-ei bad ki Mynder Ri- khamtam ïa ki Hindu bad ki Muslim ?. Ka jingktah ka long kaba shyrkhei. Kan ktah ïa ka ïoh ka kot, ka imlang sahlang, ïa ka shong ka sah, ka kamai kajih, ka sain hima sima, ka shongsuk shongsaiñ bad ïa ki riti ki dustur,kumjuh ka shongkha shongman, ka niam ka rukom bad kumta ter ter. Oh shisha, kaba bun syrtap bad ki mih shibun ki jingma kiba shyrkhei. Kumta, kaba kum kane ka ain ka sniew sha ba palat.
Kane ka jingïakhih paidbah ka klang tang ha kane ka thaiñ shatei lam mihngi, khamtam ha kine ki 7/8 tylli ki jylla. Ha kiwei kiwei ki thaiñ jong ka India kam shym la don ka jingïakhih da u paidbah hynrei shu pyrshah tang katto katne ki party ha Lok Sabha ha ka sngi ba pass ïa kane ka Bill, kata ha ka 8 tarik mynta u bnai. Ki seng bapher bapher jong kane ka thaiñ naduh ki seng bhalang kum ka KMSS, AJYCP, NESO, HYNF, HYC, FKJGP, AASU, APSU,NSF,SFI ki seng sain hima, ki sorkar jylla, ki khlieh nongsynshar, ki riew said aiñ, ki nongthoh khubor, ki nongput nongtem, ki actor/actress, ki nongthoh kot bad kiwei kiwei ki ïakhih pyrshah ïa kane ka Bill jong ka NDA. Ki samlpa pule ha ki kolej bad University bapher ki ïakhih, kumba la jia ha Gauhati University, ka Dibrugarh University, Cotton University, Tezpur University, Jorhat Medical College, JB College,, PUB Gauhati college, DCB college bad ki samla pule jong kane ka thaiñ North East ki ïakhih jur ym tang ha Assam bad Meghalaya hynrei ha Delhi ruh kumba la jia ha Jantar Mantar ban pynpaw pyrshah ïa kane ka Bill bad ha kajuh ka por ban pyrshah ïa ki Mynder Ri ha Ri India bad ha kane ka thaiñ North East. Ha kine ki jingïakhih ki la don kiba la ïap bad mynsaw jur ruh bad la thang ïa ki tynshop jong ki Nongïalam BJP kum ka jong u Narendra Modi, Sarbananda Sonowal bad ka jingkhang lynti ïa ki heh sorkar BJP ha ki jaka bad ki jingïalang bapher bapher. Kane ka jingïakhih kan nang jur shuh shuh katba nang ïaid ki sngi lada ka sorkar kam treh ban weng ne pynduh ïa kane ka Bill.