Press "Enter" to skip to content

Khreh ka Meghalaya ban ïakhih pyrshah ïa ka Citizenship Bill jong ka sorkar NDA

Yn mih ki Congress, lama ïong ki 3 Seng:Seng Riewlum pat ?

Shillong: Hadien ka pakhang shnong da ka NESO ha ka 8 tarik mynta u bnai bad ka khang ïaid kali jong ka CoHSO ha ka miet Sngi Balang, ka Meghalaya, ka la pynkhreh ban bteng ïa ka jingïakhih pyrshah ïa ka Citizenship Amendment Bill, 2016, jong ka sorkar National Democratic Alliance (NDA) ba la mynjur ruh da ka Lok Sabha ha ka sngi ba ar.
Kawei na kine ki jingïakhih kadei kaba la ïalam da ka Seng Congress, ha kaba ka Meghalaya Pradesh Congress Committee, ha kaba yn ïashim bynta da ki MLA, MDC bad kiwei kiwei de ki nongïalam ka Seng. Kane ka jingïakhih kan long hakhmat ka ophis jong ka Congress Bhavan ha Khyndailad.
Kawei pat ka jingïakhih kadei ka jingdeng lama ïong da ki lai tylli ki Seng, kata ka FKJGP, HNYF bad RBYF.
Ha ka jingkhang ïaid kali da ka CoHSO, ka kynhun jong ki 14 tylli ki Seng, kaba la sdang naduh ka por 7 baje janmiet sngi Balang, ki surok ki la kynjah jar naduh ka por 7:30 eiei janmiet. Ha nongbah Shillong, ki kali naduh ka por 7 baje ki la sdang ban ïaphet kyrkieh bad naduh 8 baje la kynjah jar, lait noh tang iwei ne artylli ki kali ba ïaid hateng hateng, kiba kynthup ïa ki kali Pulit, kali ki Press bad ki kali leit Hospital. Ha kiwei kiwei ki District jong ka Khasi Jaiñtia Hills, ki khubor ki ïathuh ba ki surok ki la kynjah bad la don satang ka jingthang shaka kali ha ki katto katne ki bynta.
La ïohi ruh ba ym tang ki surok, hynrei ki dukan ruh bun ki la khang, tang shu poi ka por 7 baje janmiet.
Ha kajuh ka por, kiba bun ki riewpaidbah, kiba la tip ïa ka jingïakhih pyrshah ka Seng Congress, ki la buh jingkylli pat ïa ki Seng Riewlum, kiba la pynpaw ruh ka jingpyrshah ïa kane ka Bill jong ka sorkar u Modi.
“Ka Congress ka la pynbna jingïakhih, ki Seng Riewlum pat ki dang ïoh thiah sah tang ha ka jingpyrshah da ka ktien”, la ong kawei ka jingthoh ha ki Social Media. Bun kiwei pat ki la ïashim bynta da kaba ong ba kim khmih lynti ba ki Seng Riewlum kin pyni da ka kam ban pyrshah, namar ki la long mlien ban pyrshah tang da ka ktien bad tang da ki jingthoh ha ki kot khubor.
Ha Assam, ka jingïakhih ka la ïai bteng, ha kaba ki Sengbhalag, ki riew paidbah, ka Seng Congress, ka Seng AGP, ki la ïakhih pyrshah ha ka sngi Balang.