Press "Enter" to skip to content

Kwah ka KHADC ban aiti noh ka Sorkar Jylla ïa ka Benami Act sha ki ADC

Shillong, K’lyngkot 10: Ka Khasi Hills Autonomous District Council (KHADC) kala pynpaw ïa ka jingkwah ba ka Sorkar Jylla kan aiti noh sha ki Autonomous District Council (ADC) ba kin pyntreikam ïa ka Benami Act jong ka Jylla namar kane ka Aiñ ka dei kaba iatreikam ryngkat ryngkat bad ka Trading by Non-Tribals Regulation Act jong ki District Council.
Kane ka sur jong ka KHADC kala mih na u Executive Member i/c Trade Bah Latiplang Kharkongor haba ïohi ba ka aiñ The Meghalaya (Benami Transaction & prohibition) (Amendment) Act, 2016 ka dei kaba ïahap ban pyntreikam da ki Autonomous District Council kiba pyntrei ïala ki jong ki Trading by Non Tribals Regulation Act.
“Kumba long mynta, ka Meghalaya Benami Act jong ka Sorkar Jylla kam shym la treikam haei haei ruh ban tehlakam ïa ka jing leh benami jong ki Nongkhaii Bar Jylla. Kane ka Aiñ ka sting thew bha ha baroh ki liang” ong une u MDC ka Nongthymmai.
Kat kum ka jingong jong u, ban lah tehlakam ïa ka jingleh benami hapoh ka Jylla, ka Sorkar kala dei ban aiti noh ïa ka Benami Act sha ki ADC ba kin pyntreikam ryngkat lang bad ka Trading by Non Tribals Regulation Act.
“Ngan hap ïakren ïa kane bad u Chief Executive Member (CEM) ban pynsngewthuh ïa u ha kaban aiti noh ïa ka Benami Act sha ka Council (KHADC) ba kan pyntreikam ban lah tehlakam ïa ka jingleh benami jong ki Nongkhaii Bar Jylla” ong u Bah Latiplang haba bynrap “Ngin hap shong bishar bha bad ngin hap pan beit ïa kane ka Act na ka Sorkar Jylla”.
Haba pynpaw ba lada ka KHADC ka ïoh ban pyntrei hi ïa ka Benami Act jong ka Jylla, kan wanrah ïa ki Amendment ba khlaiñ, u Bah Latiplang ula ong “Kumba long mynta, kaei ka jingpynshitom ne jingpynsajia lada ki bor Sorkar ki ïohkem ïa ki briew ba leh benami. Kaba kut hi ka long tang ka jingthaw ïa ka Committee ba khlieh da u Superintendent of Police u ban sa shong bishar ïa kii jingujor bad ki kot ki sla hynrei ym don eiei shuh lait nangta”.
U Bah Latiplang u ïathuh ba ïa kane ka sur, ula dep pynpaw teng sha u CEM barim Bah Adelbert Nongrum ha ka por ba ka Sorkar Jylla ka pan ïa ki jingai jingmut na ka KHADC ban pynkylla thymmai ïa ka Benami Act hynrei kane kala shu kut kumto.