Press "Enter" to skip to content

Shah weng syndon u hehduh ka CBI

New Delhi: U hehduh ka CBI, u Aloke Verma, uba la shah thung biang ha ka kam da ka Supreme Court arsngi mynshuwa, ha ka sngi Palei, u la shah weng syndon na ka kam, lyngba ka Komiti ba la khlieh da u Myntri Rangbah duh ka ri, u Narendra Modi.
U Verma, uba la shah shong shuti ha ka sorkar hadien ka huri hura ha ka CBI, u la ïoh kiew biang ha ka shuki myn ha ka sngi ba ar, lyngba ka hukum jong ka Supreme Court, ula shah weng hadien ba u Modi bad u nongmihkhmat u Chief Justice ka India, u Nongbishar Sikri, ki la pyrshah ïa u bad u nongïalam ka liang pyrshah na ka Congress u Mallikarjun Kharge, u la kyrshan ïa u Verma.
Ka Komiti kaba la thung bujli da u Nageshwar Rao, ka la weng ia u Verma, halor ka jinglap ka Central Vigilance Committee, ba u Verma u la don bynta ha kiba bun ki kam bam pisa ha ka por ba u tohkit ïa kiba bun ki jingujor.
Nalorkata ruh, hadien ba u la shimti biang ïa ka kam tang hapoh shi sngi, ula pynkynriah kam ïa ki san ngut ki ophisar ka CBI, da kaba wanrah biang ïa ki briew kiba ïajan bad u ha ka CBI ha Delhi.