Press "Enter" to skip to content

Sngewnguh ki Jugali ka MeECL ïa u synniang jong u Bah Thomass Passah

Shillong, K’lyngkot, 10: Ki Jugali jong ka tnat Meghalaya Energy Corporation Limited (MeECL) ki la pynpaw ka jingsngewnguh bad ka jingai khublei kaba kyrpang ïa ka Khun Hynñiewtrep National Awakening Movement (KHNAM) State Youth Wing khamtam eh ïa u President u Bah Thomas Passah.
Ban pynpaw ïa kane ka jingsngewnguh, kane ka kynhun ki nongtrei Jugali ki la leh burom ïa u Bah Thomas u ban sa ïakhun ïa ka elekshon MDC sha ka Iingdorbar Thawaiñ ka Khasi Hills Autonomous District Council (KHADC), ha ka jingïalang kaba la long ha Dorbar Hall, Lumkshaid, Shillong.
Ha kane ka jingïalang, ki nongïalam jong ki Jugali ki la pynkynmaw ïa ka lynti ïaid bad ki jingïatynjuh ba ki la ïakynduh bad ka jingnoh synniang jong u Bah Thomas ban pynïoh ïa ka hok jong ki.
Lah ban pynkynmaw ruh hadien ba ki ladep ban pyndep ïa ka Written Test bad ka Physical Test ha u snem 2012 da ki hajar ki samla ki la shu ïa ap la ka lawei jong ki kan long kaba don jingkyrmen neem, hynrei haduh u snem 2015 ruh ka jingpyndep hok ïa ka Written Test bad ka Physical Training kam shym la seisoh namarba khlem ïohi ba kan mih ka result jong kane ka eksamin, bun na ki samla ki la duh jingkyrmen.
Hadien ka jingtuklar jong ka KHNAM State Youth Wing hapoh ka jingïalam jong u President tang hadien khyndiat bnai ka MeECL ka la pynlait paidbah (notify) ïa ka thup kyrteng jong ki 772 ngut ki samla kiba la pyndep ïa kane ka eksamin bad kane sa shisien ka la ai mynsiem ïa baroh ki nongthep kam Jugali.
Watla katta ruh ka jingpynslem pat jong ka MeECL ban thung pat ïa kine ki ba la pas ka la sdang pynduh mynsiem biang ïa kiba la pas ïa ka post Jugali, hynrei na ka liang jong u Bah Thomas ha u snem 2016 u la kular rangbah ban un ym shongthait ban ïakhun tad haduh uwei pa uwei u ba la pas un ïoh ïa ka hok ka jong u bad hadien ka jingïaksaid bad jingïakhun kaba slem bad kaba khlem shongthait ka hok ka la ieng bad baroh ki 772 ngut ki samla ki la ïoh ban long ki nongtrei bapura jong ka MeECL kaba la long ka jingkyrkhu ïa ki longiing ki longsem bad ki samla kiba bun.
Kane ka prokram ka dei ban ithuh bad ai mynsiem shushuh ïa ka mynsiem ban ïakhun jong u Bah Thomas naka bynta jong u paidbah ha ki snem bad ki sngi ki ban dang wan.
“Kane kam dei ka jingpyrshang ban put turoi hynrei ka jinghikai ba ïa ka sharak kaba ai jingshai ngim dei ban burieh ha khrum hynrei ban sei shabar khnang ba kan long ka jingshai ïa kiba bun balang,” ong ki nongïalam jong kiba ïoh ïa ka kam Jugali ha MeECL.
“Ngi ai khublei ruh ïa baroh ki bor pynïaid jong ka MeECL kiba la pynïoh ha ngi ïa ka bynta ka jong ngi bad ïa baroh kiba la ïadon ryngkat ha kane ka jingïakhun,” ki la ong.
Na ka liang jong u Bah Thomas u la kyntu ïa baroh ba kumba baroh ki la ïoh ïa ka hok ka jong ki, kumta ki dei ban long ruh kiba shakri hok pat ïa u paidbah lyngba ka kam ka jong ki.