Press "Enter" to skip to content

Ujor sha ka DC ba ïaid ki trok na Surok Lailad-Umling

Nongpoh, K’lyngkot 10: Halor ka jingïaid tuh ki trok kit dewïong na ka Surok Umrit sha Umling ban lait na ka jingsiew khajna ha ka khyrdop ka Sorkar kaba don ha Shangbangla, ka Synjuk ki Shiphew Shnong jong ka Tasku Area ha Ri Bhoi ka la ujor sha ka Deputy Commissioner da kaba kyrpad ba ka dei ban shimkhia ban khanglad ïa ki trok kiba ïaid na katei ka surok.
Ka Synjuk mynta ka sngi thohdieng ka la leit aiti ïa ka shithi ujor sha ka Deputy Commissioner ka Ri Bhoi, ka Kong R.M Kurbah bad sha u Superintendent of Police (SP) ka Ri Bhoi District, u Bah Spill Thamar bad kumjuh ruh sha u E.E ka tnad PWD, Nongpoh Division ban kyrpad na ka bynta ban tehlakam ïa ka jingwan rung tuh ki kali kit dewïong na katei ka surok paidbah.
Ha ka shithi ujor ba la phah sha ka Deputy Commissioner ka Ri Bhoi, ka Synjuk ka la pynpaw ïa ka jingsngewkhia ba ka jingwan ki trok dewïong na katei ka surok ka la ktah ym tang ïa ka ïaid ka ieng ki paidbah, hynrei ka la ktah ruh khamtam ka jingsniew jong ka surok bad ruh ba ka don ka jingma ha ka jingkieng ha Lailad kaba lah ban khyllem ne twa noh da ka jingkit palat pud ki trok ïa u Dewiong.
Ki la pynpaw ruh na ka daw ka jingwan ki kali heh bad ki kali ba la kit palat pud ka la pynsniew ha shi lynter ka surok naduh Umrit shaduh sha Umling bad 20mer bad khamtam ka jingma kaba la lah ban ktah ka dei ka jingma ba ka jingkieng Lailad ka lah ban twa noh ha kano kano ka por ha kaba ka sorkar ka shah ban kit ïa ki Kali tang hapoh 10 ton hynrei kiba bun ki trok dewïong pat ki kit palat ban ïa ka 10 ton ha kaba ïa mynta wat katei ka jingkieng ka la synjor bad ka don ha ka jingma.
Khnang ban ym buh jingeh ïa ki paidbah na ka daw ka jingsniew ka surok bad ruh ba ka jingkieng ha Lailad kan ym buh jingma, ka synjuk katkum katei ka shithi ujor ki la kyrpad jur ïa ka DC ba kan shimkhia bad kynthup ruh ïa u SP bad ïa ka tnad PWD khnang ha ki por ban sa wan ki trok dewïong kim dei shuh ban dang wan na katei ka surok.