Press "Enter" to skip to content

Ym don aiñ ha India ban khang ïano ïano ban ngeit ha kano ka niam

Pynksan ka Delhi High Court ïa u Doktor na Amerika
New Delhi: Ha ka rai ka ban long ka jingai mynsiem ïa ki briew ba nabar ri kiba trei ïa ki kam mission ha ri India, ka Delhi High Court, ha ka sngi palei, ka la pynksan ïa ka jingshakri uwei u Doktor na Amerika, uba la shakri ha kawei na ki Hospital ka Balang Khristan ha Bihar. \
Ha ka rai ba ai halor ka jingujor ka Alliance Defending Freedom, ka kynhun ki nongsaid aiñ ba kynthup ruh ïa ki Khasi, ka Kashari jong ka Delhi, ka la ong, “Ym don aiñ ha ri India ban khang ïano ïano ban ngeit ha kano kano ka niam”.
Kane kadei ka rai halor ka jingshakri u Dr. Christo Phillip, u nong India ba la sah ha Amerika, hynrei uba la wan sha India ha u 2014 ban shakri ha ka Hospital Mission ha Bihar. Ha ka snem 2016, haba u dang wan phai na ka jingïalang ha Greece, u la shah bat ha Delhi Air Port, ha kaba ki bor sorkar ki la ong ba um lah ban rung shuh ha India, namar ka Appellate Authority jong ka Ministry of Home Affairs, Foreigners Division, ka la ujor ba u Doktor Christo, u trei ruh ïa ki kam mission ha katei ka Hospital.
Ka Kashari ka la ong, “Lada kata ka jingngeit jong u Doktor ka ai mynsiem ïa u ba un nang trei khambha shuh shuh ïa ka kam ha Hospital, u long laitluid ban leh ïa kata”.
Ha katei ka por ba u shah bat ha Delhi Airport, u Dr. Christo, u la hap leit phai sha Greece bad la shah tang ïa ka ïing jong u ban rung ha India. Na Greece u Doktor u la leit sha Turkey bad hadien u sa ïoh lad ban ïakynduh ïa kiba haïing ha Nepal.
Ka Kashari ka la hukum ban ai biang ïa ka Overseas Citizens of India ïa une u Doktor, kaba u la shah knieh noh hadien ka jingshah bat ha Delhi Airport.
Kane ka rai ka la pynkmen shibun ïa ki Khristan ha India, kiba la mad bun ki jingeh, ha kaba ïadei bad ki jingtrei mission, khamtam da ki briew kiba nabar.